Британия «Россия билан алоқалари туфайли» Ўзбекистоннинг 4 та компаниясига қарши санкциялар киритди

Буюк Британия Россияга қарши санкциялар рўйхатини янгилаб, унга Ўзбекистоннинг тўртта ва Қирғизистоннинг битта компаниясини киритди. Ушбу бизнес субъектлари Россия билан «иқтисодий ҳамкорликда» гумон қилинмоқда, шу муносабат билан Лондон 18 декабрдан бошлаб активларни музлатишдан ташқари уларга қарши молиявий чекловлар жорий қилмоқда, дейилади Британия Ғазначилиги ҳужжатларида (.pdf).

Ўзбекистонда рўйхатдан ўтган компаниялар орасида қуйидагилар санкциялар рўйхатига киритилган:

- Фарғона кимё заводи;

- Gelion Business Trade МЧЖ (Тошкент);

- Chemistry International МЧЖ ҚК (Навоий);

- Raw Materials Cellulose МЧЖ (Жиззах).

Британия расмийларига кўра, бу компанияларнинг барчаси Украина ҳудудидаги урушда қандайдир тарзда фойдаланилаётган товарлар ёки технологияларни Россияга етказиб берганликда гумон қилинмоқда. Бошқа тафсилотлар келтирилмаган.

Янгиланган рўйхатда Бишкекда рўйхатдан ўтган «Кифико» компанияси ҳам бор. Лондон ушбу компанияни молия секторида бизнес юритиш орқали Россия ҳукуматини қўллаб-қувватлашда айблаган.

Бундан ташқари, айрим шахсларга нисбатан санкциялар жорий этилди. Ушбу рўйхатда Британия Ғазначилиги маълумотларига кўра, уч давлат: Ўзбекистон, Исроил ва Россия фуқаролигига эга бўлган тадбиркор Рустам Мўминов ҳам бор. Аввалроқ Украина бу тадбиркорга нисбатан чекловлар жорий қилганди. Аниқлик киритилишича, Мўминов Фарғона кимё заводига эгалик қилувчи компания таъсисчиси ҳисобланади.