НАТО РФ ҚКда КХДР қўшинлари борлигини ҳозирча тасдиқламади

Айни пайтда НАТО Жанубий Корея разведкасининг Шимолий Корея қўшинлари Украинага қарши урушда Россия томонида жанг қилишлари ҳақидаги хабарларини тасдиқлай олмайди. Бу ҳақда алянс бош котиби Марк Рютте 18 октябр, жума куни Брюсселдаги матбуот анжуманида журналистлар саволига жавобан айтиб ўтди.

Унинг аниқлик киритишича, бу айни пайтда НАТОнинг расмий позицияси, аммо у ўзгариши мумкин. Алянс барча маълумотларни олиш учун Жанубий Корея билан алоқада, дея қўшимча қилди Рютте.

«Ҳар қандай ҳолатда ҳам, Шимолий Корея жисмонан жанг майдонида бўлмаса-да, у Эрон ва Хитой каби Россиянинг Украинага қарши урушни кучайтиришга ёрдам беряпти», деди Шимолий Атлантика алянси раҳбари.

Зеленский КХДРни урушда Россия томонида қатнашишда айблади

Украина президенти Володимир Зеленский 16 октябр куни Олий рададаги нутқида «ғалаба режаси» тақдимоти олдидан Шимолий Корея қўшинларининг Украинага қарши агрессив урушда Россия томонида бевосита иштирок этгани ҳақидаги тасдиқланган фактларни маълум қилди. «РФ раҳбарияти бошчилигидаги «ҳужумчилар коалицияси» ҳозирда 20 миллион корейсни гаровда ушлаб турган Ким оиласи бошчилигидаги Шимолий Кореяни ўз ичига олади, бизнинг разведка хизматларимиз нафақат КХДРдан Россияга қурол-яроғ, балки одамлар ҳам ўтказилганини қайд этяпти», — дейди Зеленский.

Украина президентининг аниқлик киритишича, гап «урушда ҳалок бўлган Россия фуқаролари ўрнига Россия заводларининг ишчилари» ва «Россия армияси ходимлари» ҳақида бормоқда. «Ва бу факт. Аслида, бу иккинчи давлатнинг Украинага қарши урушда Россия томонида иштирок этиши», — дея таъкидлади Зеленский. У шунингдек, Эрон режимининг РФга тўғридан тўғри ёрдами ҳақида гапирди. Украина президенти Россия Федерацияси ва Хитой ўртасидаги ҳамкорлик ҳам давом этаётганини айтди. «Баёнотлардан фарқли ўлароқ, Пекин РФ раҳбариятини, унинг тажовузкорлигини ва БМТ Низоми бузилишини тўхтатиш учун ҳақиқий қадамлар қўйишдан тийилмоқда», — деди Зеленский.