КХДР Сариқ денгиз йўналишида икки қанотли ракета синовини ўтказди

Шимолий Корея етакчиси Ким Чен Ин Корея яримороли ғарбида, Сариқ денгиз йўналиши томон учирилган узоқ масофали икки стратегик қанотли ракетанинг синов парвозини кўздан кечирди. Бу ҳақда душанба, 29 декабр куни, “Рёнхап” ва AFP ахборот агентликлари хабар берди.

Шимолий Кореянинг КМТА (KCNA) агентлиги аниқлаштиришича, ракеталар 28 декабр куни белгиланган траектория бўйича 10 199 сония ва 10 203 сония учган, шундан сўнг нишонни уриб туширган.

Сеулдаги маълумотларга кўра, ракеталар Пхенян яқинидаги Сунан ҳудудидан учирилган.

Бундан олдин Шимолий Корея ноябр ойи бошида баллистик ракеталар синовини ўтказган эди — бу АҚШ президенти Доналд Трамп минтақадаги ташрифи чоғида Ким Чен Ин билан учрашишдан манфаатдор эканини билдирганидан тахминан бир ҳафта ўтгач содир бўлган. Пхенян бу таклифга жавоб қайтармаган.

Октябр ойида АҚШ Жанубий Корея учун ядровий сувости кемасини қуриб бериши маълум қилинган эди. Бу ҳақда АҚШ президенти Доналд Трамп Сеулга ташрифи вақтида баёнот берган. “Бизнинг ҳарбий иттифоқимиз ҳар қачонгидан ҳам мустаҳкам. Шунинг учун мен уларга ҳозирдаги эскирган ва анча кам манёврли дизел сувости кемалари ўрнига ядровий сувости кемасини қуриш учун рухсат бердим”, — деб ёзган Трамп 29 октябр куни TruthSocial ижтимоий тармоғида.

Шу билан бирга, The New York Times газетаси 25 декабр куни КХДР ўзининг ядровий энергетик қурилмага эга илк сувости кемаси фотосуратларини намойиш этганини хабар қилди.

Мутахассислар ҳар икки Корея тез суръатда қуролланиш пойгасига тортилаётгани, Шимоли-Шарқий Осиёдаги бошқа мамлакатлар ҳам мудофаа харажатларини ошираётгани ҳақида огоҳлантирмоқда. “Ҳеч қандай шубҳа йўқ — биз аллақачон қуролланиш пойгасида турибмиз. АҚШ иттифоқчилари орасида минтақада америкаликларнинг хавфсизлик бўйича ваъдаларидан хавотир кучаймоқда”, — деган эди DW’га берган интервюсида тарих ва халқаро муносабатлар бўйича Кунмин университети профессори Андрей Ланков.