“Бадбўй ҳидидан нафас оляпмиз” – Сўхда канализация суви ариққа оқмоқда

Фарғона вилояти Сўх туманининг Навобод маҳалласида жойлашган кўп қаватли уйларнинг канализация тармоғи носозлиги туфайли ариқларга оқмоқда. Атрофни бадбўй ҳид қоплаган. Масъуллар негадир муаммони бартараф қилишга шошилмаяпти.

Кўп қаватли уйларда яшовчи фуқароларнинг маълум қилишича, канализация тармоғи суви ариқдаги аҳоли фойдаланадиган сувга қўшилиб оқяпти. Аҳоли тегишли ташкилотларга масаласи юзасидан мурожаат қилишган. Бироқ натижа бўлмаган.

“120 хонадонга мўлжалланган 4 та 5 қаватли уй қурилиб, 2023 йилда фойдаланишга топширилган. Бир йилдан бери канализациянинг бадбўй ҳидидан нафас олиб ўтирибмиз. Айниқса ёз ойларида деразани очиб бўлмайди. Уйни 20 йил муддатга ипотека кредити асосида сотиб олганмиз. Канализация тармоғи нотўғри ётқизилган.

Тегишли ташкилотларга чиққанмиз, лекин натижа йўқ. Ўзимиз пул тўплаб, машина чақириб тозалатамиз, лекин яна оқова сув отилиб чиқиб кетаверади. Энг ачинарлиси, ифлос сув одамлар фойдаланадиган ариқ сувига қўшилиб кетяпти. Ҳолатга ҳеч ким эътибор қаратмаяпти”, дейди кўп қаватли уйда яшовчи фуқаролардан бири.

Сўх тумани Сувтаъминот бўлими раҳбари Фарҳоджон Азимбековнинг Kun.uz’га маълум қилишича, кўп қаватли уйнинг канализация тармоғи “Қишлоқ қурилиш инвест” инжиниринг компанияси Фарғона вилояти филиали буюртмаси асосида “Намунали юксалиш” ҳамда “Шоҳ мега инвест” МЧЖлар томонидан ишга туширилган. Канализация қувурига чиқинди ташланиши оқибатида оқова сувни тортиб бераётган насослар ортиқча юклама билан ишлаб, носоз ҳолатга келиб қолган.

Фарҳоджон Азимбековга кўра, тез орада қурувчи билан келишган ҳолда муаммо ҳал этилади.

Сарвар Зиёев,
Kun.uz