«Россияга бир қарич ҳам ер берилмайди» – Зеленский

Украина ўз ҳудудининг бир қаричини ҳам Россияга бермайди. Бу ҳақда мамлакат президенти Володимир Зеленский 23 октябр куни Брюсселга ташрифи чоғида айтиб ўтди.

Зеленский Euronews журналисти саволига жавоб қайтараркан, Россия билан бўлажак тинчлик музокараларида ҳеч қандай ҳудудий ён беришлар бўлмаслигини қатъий таъкидлади.

Украина етакчиси АҚШ ва Евроиттифоқнинг янги санкциялари Россияни ўт очишни тўхтатишга ҳар қачонгидан ҳам яқинлаштирганлигини қайд этди.

«Россия энергетикасига қарши санкциялар киритилди. Украина иштирокисиз Венгрияда учрашув ўтказилмайди. Украинада ҳозирча Tomahawk йўқ. Мана қандай натижа. Бу ёмонмас», – деди у ЕИ раҳбарлари саммитидаги матбуот анжуманида.

16 октябр куни Трамп Россия президенти Владимир Путин билан мулоқот қилган, улар яқин ҳафталарда Будапештда учрашув ўтказишга келишиб олишгани маълум қилинганди. Россия ташқи ишлар вазири Сергей Лавров ва АҚШ давлат котиби Марко Рубио 20 октябр куни бўлажак учрашув тафсилотларини келишиб олиш учун қўнғироқлашди.

Бироқ 22 октябр куни Трамп Путин билан учрашув бекор қилинганини айтди.

«Биз боришимиз керак бўлган манзилга етолмайдиганга ўхшаймиз. Шунинг учун учрашувни бекор қилдим. Лекин кейинчалик учрашамиз», – деди у.

Зеленский Европа кенгаши йиғилишида Американинг узоқ масофага мўлжалланган Tomahawk қанотли ракетларини Европа мамлакатларидан олиш ниятида эканлигини билдирди.

«Узоқ масофага мўлжалланган қуроллар нафақат АҚШда, балки Европанинг айрим мамлакатларида ҳам бор, хусусан, «Томагавк»лар. Биз ёрдам бериши мумкин бўлган мамлакатлар билан музокара олиб боряпмиз», – деди у.

Унинг сўзларига кўра, Украина ҳам ўзининг узоқ масофага мўлжалланган қуроллари билан 3 минг километргача масофага зарба бера олиши мумкин.

Европада икки мамлакат – Буюк Британия ва Нидерландия Tomahawk ракеталарига эга.

Володимир Зеленский шунингдек, Хитой ҳақида ҳам фикр билдирди.

«Си менга Хитой Россияга қурол сотмаслигини айтганди. Бир нарсани биламан – Хитой Россияга ёрдам беряпти. Хитой бизнинг ғалабамиз ва Россиянинг мағлубиятидан манфаатдор эмас», – деди Украина президенти.