АҚШ, Қатар, Туркия ва Миср Ғазода ўт очишни тўхтатиш бўйича якуний келишувни имзолади

Миср, Қатар, АҚШ ва Туркия раҳбарлари 13 октябр куни Шарм аш-Шайхдаги тинчлик саммитида Ғазода ўт очишни тўхтатиш бўйича якуний келишувни имзолади.

АҚШ президенти Доналд Трамп маросим чоғида ҳужжат «кўплаб қоидалар, низомлар ва бошқа кўплаб нарсаларни баён қилишини - у жуда кенг қамровли» эканини айтди.

Оқ уй раҳбари 13 октябрни Яқин Шарқ учун ниҳоят тинчлик келтирган «буюк кун» деб атади.

«Бугун биз нишонлаётган бурилиш воқеаси Ғазодаги урушнинг тугашидан ҳам муҳимроқдир. Худо хоҳласа, бу бутун Яқин Шарқ учун янги даврнинг бошланиши бўлади», деб қўшимча қилди у.

Саммитга 30 дан ортиқ давлат етакчилари ташриф буюрди. Меҳмонлар орасида Фаластин миллий маъмурияти раҳбари Маҳмуд Аббос ҳам бор.

Шу билан бирга, саммитда Исроил бош вазири Бинямин Нетаняҳу иштирок этмади - сўнгги лаҳзада у 13 октябр куни кечқурун бошланадиган яҳудий байрамига ишора қилиб, иштирок этмаслигини маълум қилди.

Аввалроқ Туркия президенти Ражаб Тоййиб Эрдўған бошқа мусулмон етакчилари қатори Нетаняҳу уларга қўшилса, бойкот эълон этиш билан таҳдид қилганди.

Саммитда ҲАМАС ҳаракати вакиллари ҳам иштирок этмади.

ҲАМАС ҳаракати 13 октябр куни 2023 йил 7 октябр куни Исроилга уюштирилган ҳужум чоғида гаровга олинган исроилликларни озод қилди. Гаровга олинганларни озод қилиш, шунингдек, Ғазо секторидаги ўт очишни тўхтатиш АҚШ воситачилигида тузилган келишув натижаси бўлди.