Макрон Лекорнюни Франция бош вазири этиб қайта тайинлади

Франция бош вазири лавозимидан тўрт кун олдин истеъфога чиққан Себастен Лекорню 10 октябр, жума куни кечқурун Франция президенти Эммануэл Макрон томонидан бу лавозимга қайта тайинланди. Елисей саройи веб-сайтига кўра, Лекорню зиммасига ҳукуматни шакллантириш топширилган.

Себастен Лекорню 2026 йилги давлат бюджети бўйича келиша олмагани учун истеъфога чиқди. Бош вазир лавозимига қайта тайинланганидан сўнг сиёсатчи X ижтимоий платформасида шундай деб ёзди: «Мен ўз бурчимни ҳис қилган ҳолда, республика президенти менга юклаган вазифани қабул қиламан: Франция йил охиригача бюджет олишини таъминлаш ва ватандошларимизнинг кундалик муаммоларига жавоб бериш учун ҳамма нарсани қилиш лозим».

«Биз французларни ғазаблантирадиган сиёсий инқирозни ва Франциянинг обрўси ва манфаатларига путур етказадиган беқарорликни тугатишимиз керак», деб қўшимча қилди Лекорню.

39 ёшли Себастен Лекорню Франциянинг собиқ мудофаа вазири ва Эммануэл Макроннинг иттифоқчиси. У биринчи марта 9 сентябрда бош вазир этиб тайинланган. Лекорню Макрон сўнгги икки йил ичида тасдиқлаган ҳукуматнинг бешинчи раҳбари.

Франциядаги сиёсий беқарорлик фонида Американинг Fitch рейтинг агентлиги 12 сентябр куни Франциянинг кредит рейтингини АА-дан А+ даражасига туширди. Бу мамлакат тарихидаги энг ёмон рейтинг ҳисобланади. Франциянинг давлат қарзи ҳозирда ЯИМнинг 115 фоизини ташкил этади, бу Европа Иттифоқида Греция ва Италиядан кейин учинчи ўринда туради.