«Жанг ортидан жанг» ва «Жаноб Ҳеч ким Путинга қарши». «Оскар»нинг барча ғолиблари

Пол Томас Андерсоннинг «Жанг ортидан жанг» номли картинаси олти номинацияда ғолиб бўлди, жумладан йилнинг энг яхши филми деб топилди. Энг яхши эркак актёр учун аталган ҳайкалчани Майкл Б. Жордан («Гуноҳкорлар»), энг яхши актриса учун аталганини эса Жесси Бакли («Гамнет») қўлга киритди. Шунингдек, Россия мактабларидаги ҳарбий пропаганда мавзусига аталган «Жаноб Ҳеч ким Путинга қарши» номли картина энг яхши ҳужжатли филм сифатида тақдирланди.

Фото: Warner Bros

Январ ойи охирида, номзодлар рўйхати эълон қилинганидаёқ ғолиблик учун асосий кураш «Гуноҳкорлар» (16 номинация) ва «Жанг ортидан жанг» (13 номинация) филмлари ўртасида кечиши маълум эди.

Якунда «Жанг ортидан жанг» (One Battle After Another) жами 6 та «Оскар»га сазовор бўлди, булар орасида энг яхши филм ва режиссёрлик учун ғолиблик ҳам бор, «Гуноҳкорлар» эса тўртта номинацияда ғолиб чиқди, жумладан, энг яхши эркак роли учун соврин шу филм ижрочисига берилди.

Пол Томас Андерсон учун узоқ кутилган «Оскар»

Пол Томас Андерсон
Фото: Kevin Winter/Getty Images

«Жанг ортидан жанг» режиссёри Пол Томас Андерсон бунга қадар 14 марта асосий киномукофот учун номзод бўлган, аммо бирор марта ғалабага эришмаганди. Андерсон ўз фаолияти давомида «Буги услубидаги тун», «Магнолия» ва «Нефт» каби филмларни суратга олган, бу филмлар учун кинотанқидчиларнинг юксак мақтовларига ҳамда кўплаб халқаро мукофотларга сазовор бўлганди.

Бу сафар Пол Томас Андерсон бирданига икки статуэткани қўлга киритди – энг яхши режиссёр сифатида ва мослаштирилган сценарий муаллифи сифатида.

Унинг филми – сўл радикал активист (Леонардо ди Каприо) ва ирқчи полковник (Шон Пенн) ўртасидаги қарама-қаршилик орқали ифодаланган ғоялар инқирози ҳақида. Танқидчилар бу картинани Андерсоннинг бошқа бир филми, ўз вақтида «Оскар»га номзод бўлган, аммо ғолиб чиқолмаган «Нефт» филми билан таққослашади.

Леонардо ди Каприо ва Бенисио дел Торо Томас Пол Андерсонни табрикламоқда

Бу филмда ирқчи полковник ролини ўйнаган Шон Пенн «Иккинчи пландаги энг яхши эркак актёр» сифатида тақдирланди. Ушбу актёр бунгача «Сирли дарё» (2003) ва «Ҳарви Милк» (2013) филмларидаги ижроси орқали иккита «Оскар» олганди.

«Жанг ортидан жанг» «Энг яхши монтаж» ва «Энг яхши кастинг» номинацияларида ҳам ғолибликни қўлга киритди.

«Гуноҳкорлар» ва «Гамнет»

«Энг яхши актёр» номинациясида асосий даъвогарлар бўлиб турган Леонардо ди Каприо («Жанг ортидан жанг») ҳам, Тимоти Шаламе («Ажойиб Марти») ҳам «Оскар»ни қўлга кирита олмади.

Бу номинацияда олтин статуэткага «Гуноҳкорлар» (Sinners) филмида 1930-йилларда бар очиш учун Миссисипига қайтган, кейин вампирлар ҳужумига йўлиқадиган эгизакларни ўйнаган Майкл Б. Жордан эга чиқди.

«Гуноҳкорлар» филми яна учта «Оскар»ни қўлга киритди – оригинал сценарий, оригинал мусиқа ва операторлик иши учун.

Энг яхши аёл роли учун ҳайкалча «Гамнет» филмидаги ижроси учун ирландиялик актриса ва қўшиқчи, «Уруш ва тинчлик», «Табу» ва «Чернобил» сериалларидаги ижроси орқали танилган Жесси Баклига берилди.

Бакли бунгача «Гамнет»даги роли учун Critics Choice, «Олтин глобус», BAFTA ва Actor Awards тақдимотларида ҳам тақдирланганди. Энди у Рене Зеллвегердан кейин мавсумдаги бешта асосий мукофотнинг барчасини қўлга киритган илк актрисага айланди. Зеллвегер 2020 йилда «Жуди» филмидаги бош роли учун «Энг яхши актриса» сифатида барча мукофотларга эга чиққанди.

«Иккинчи пландаги энг яхши актриса» номинациясида Эми Мэдиган («Қурол») ғолиб чиқди. Бу унинг иккинчи бор «Оскар»га номзод бўлиши эди – биринчиси 40 йил муқаддам «Ҳаётда икки бор» филми учун бўлганди.

Эми Мэдиган иккинчи пландаги энг яхши актриса сифатида ўзининг биринчи «Оскар» мукофотини қўлга киритди. Суратда Мэдиган турмуш ўртоғи, актёр Эд Ҳаррис билан.

«Оскар» ҳайкалчалари сони бўйича учинчи ўринни «Франкенштейн» эгаллади. Филм учта номинацияда ғолиб бўлди: энг яхши грим, энг яхши костюм дизайни ва саҳналаштирувчи рассомнинг энг яхши иши бўйича.

«Аватар: аланга ва кул» «F-1», «Гуноҳкорлар» ва «Юра даври дунёси: уйғониш» филмларини ортда қолдириб, визуал эффектлар учун совриндор бўлди.

«F-1» эса «Энг яхши овоз» категориясида ғолиб чиқди.

Норвегиянинг «Сентиментал қадрият» картинаси энг яхши хорижий филм сифатида тақдирланди.

«Жаноб Ҳеч ким Путинга қарши»

«Энг яхши ҳужжатли филм» йўналишида Россия ҳақидаги картина – «Жаноб Ҳеч ким Путинга қарши» (Mr. Nobody against Putin) ғолиб деб топилди.

Филм Дэвид Боренстайн ва Павел Таланкин режиссёрлигида суратга олинган. Лента Карабаш шаҳрида Таланкин мактаб видеографи сифатида яширинча олган тасвирларга асосланган. У
«ватанпарварлик руҳида тарбиялаш» дарсларини ҳам видеога муҳрлаган.

Картина олдинроқ энг яхши ҳужжатли филм сифатида BAFTA мукофотини ҳам қўлга киритганди.

Тақдирлаш маросимида Павел Таланкин саҳнада рус тилида гапирди. «Тўрт йилдан бери юлдузли осмонга тикилиб, энг муҳим тилакни тилаймиз. Жуда муҳим тилак.

Лекин шундай мамлакатлар борки, осмондаги юлдузлар ўрнига бомбалар тушади, дронлар учади. Келажагимиз учун, барча фарзандларимиз учун барча урушларни тўхтатайлик. Ҳозироқ», – деган Таланкин.

Филм режиссёри Дэвид Боренстейн жиноятлар ва пропагандадаги кичик иштирок ҳам оғир оқибатларга ҳисса қўшиши ҳақида гапирган. «„Жаноб Ҳеч ким Путинга қарши“ – мамлакатни қандай бой бериш мумкинлиги ҳақидаги филм. Ушбу кадрлар устида ишлаганимизда, биз уни сон-саноқсиз кичик иштирокчилик актлари орқали йўқотиш мумкинлигига гувоҳ бўлдик», – дейди Боренстейн.