«Эски тузумдан қолган амалиёт». Прокурорларнинг суд қарорини ўрганиши чекланади

Президент Шавкат Мирзиёев парламентга мурожаатномасида суд-ҳуқуқ соҳасига оид масалаларга тўхталиб ўтди.

«Энди суд орқали инсонларнинг ҳуқуқи тикланганини эътироф этиш билан чекланиб қолмасдан, нима сабабдан судгача бўлган тергов жараёнида инсон ҳуқуқ ва эркинликлари бузилган, деган саволни ҳам кўндаланг қўядиган, тазйиқлар учун жавоб берадиган вақт келди.

Эски тузумдан қолган ва ҳануз давом этаётган суд қарорларини прокуратура томонидан чақириб олиб, ўрганиш амалиётини чеклаш лозим.

Энди фақат иш юзасидан шикоят келиб тушган ҳолдагина прокурор суд қарорини олиб ўрганиши мумкин», – деди давлат раҳбари.

Маълумот учун, халқаро стандартларга мувофиқ судьяларни баҳолаш судьялар хамжамияти томонидан амалга оширилади. Халқаро экспертлар фикрига кўра суд раислари ваколатида бу каби функциялар бўлиши суд мустақиллигини чеклаб қўяди. Шу сабабдан бу ваколат Судьялар олий кенгаши ваколатига ўтказилиши кутилмоқда.

Шунингдек, судларнинг ортиқча юкламаларини камайтириш мақсадида уларнинг айрим функцияларини (апостил, суд буйруғи) бошқа ваколатли идораларга, хусусан нотариусларга берилиши мумкин.

Президентнинг таъкидлашича, суд раислари томонидан судьяларнинг фаолиятини баҳолаш ва уларга нисбатан интизомий иш қўзғатиш бўйича ваколатларни қайта кўриб чиқиш керак.

«Давлат идоралари мансабдорлари шуни чуқур англаб олсинлар: судлар мустақиллигини таъминлаш масаласи бундан буён ҳам шахсан Президентнинг қаттиқ назоратида бўлади.

Суд остонасига қадам қўйган ҳар бир инсон Ўзбекистонда адолат ҳукм сураётганига тўла ишонч ҳосил қилиши керак.

Акс ҳолда, буюк немис файласуфи Иммануил Кант айтганидек, «адолат йўқолган пайтда ҳаётнинг қадрини белгилайдиган бошқа ҳеч нарса қолмайди».

Бу ҳақиқатни ҳеч қачон унутмаслигимиз керак. Ўзбекистонда судьялар қонунларнинг толмас ҳимоячилари, адолатнинг мустаҳкам устунлари бўлиши керак», – деди Шавкат Мирзиёев.

• Шавкат Мирзиёев суд-ҳуқуқ соҳасида эришилган энг катта ютуқни маълум қилди
• Ўзбекистонда бешта кодекс янгидан қабул қилинади
• Прокурор қарори устидан судга мурожаат қилиш тартиби жорий этилади