Трамп Путиндан норозилигини билдирди ва «кичик сюрприз» ваъда қилди

АҚШ президенти Доналд Трамп Россия ва Украина ўртасида тинчлик ўрнатиш бўйича ҳаракатлари контекстида РФ президенти Владимир Путинни кескин танқид қилди.

«Кўп одам ўлмоқда ва бу тўхтатилиши керак. Тўғрисини айтганда, биз Путиндан фақат беҳуда гапларни эшитяпмиз. У доимо жуда хушмуомала, аммо охир-оқибат бундан ҳеч қандай фойда бўлмади», – деган у.

Трамп Путин билан мулоқот қилишга тайёрлигини айтган, аммо РФ президентидан «норози» эканини қайд этган.

Трамп, шунингдек, сенатор Линдси Грэм томонидан таклиф қилинган Россияга қарши янги санкциялар пакетини «жуда жиддий» кўриб чиқаётганини таъкидлади. У тегишли саволга батафсил жавоб беришдан бош тортди: «Хўш, мен буни сизга айтмаган бўлардим. Кичик сюрприз қилмаймизми?»

Сўнгги ҳафталарда Трамп Путин ҳақида тобора кўпроқ салбий фикрлар билдирмоқда. 3 июл куни бўлиб ўтган сўнгги телефон мулоқотидан кейин у Россия-Украина масаласида олдинга силжиш йўқлигидан «ҳафсаласи пир бўлгани»ни айтган ва Россия президенти урушни тўхтатишга «тайёр» эканига шубҳа билдирганди.

Россияга қарши янги санкциялар тўғрисидаги қонун лойиҳаси илк бор апрел ойида эълон қилинган ди, шундан бери 100 нафар сенатордан 80 нафардан ортиғи уни қўллаб-қувватлади. Ҳужжат Россия билан савдо қилувчи ва шу билан бирга Украинага ёрдам бермайдиган мамлакатларнинг барча маҳсулотларига 500 фоиз миқдорида Америка божларини жорий этишни назарда тутади.