АҚШ Венесуэла ҳукуматига Мадуронинг ҳимояси учун ҳақ тўлашга рухсат берди

24 апрель куни расмий Вашингтон Венесуэла ҳукумати Николас Мадуронинг ҳимоячи адвокатлари хизмати учун ҳақ тўлаши мумкинлигини тан олди. Бу масала мазкур иш доирасида бир неча ҳафтадан бери очиқ қолаётган эди.

Нью Йорк Жанубий округи прокурори Манхеттен федерал судига топширган мактубда – АҚШ Ғазначилик департаменти лицензияларга ўзгартириш киритганини маълум қилди. Ушбу ўзгартириш – Венесуэланинг собиқ президенти Николас Мадуро ва унинг рафиқаси Силия Флореснинг адвокатларига ўз мамлакати ҳукуматидан тўловларни қабул қилиш имконини беради.

New York Times'нинг ёзишича, воқеаларнинг бундай ривожи – судья Алвин Хеллерштейн ҳукуматдан маблағлар нима сабабдан блокланаётганини қатъий сўраган мажлисдан бир ой ўтиб юз берди. Судья ҳатто, агар Қўшма Штатлар ўз позициясини ўзгартирмаса, ишни бутунлай тугатиш масаласини кўриб чиқиши мумкинлигига шама қилганди.

Аввалроқ Ғазначилик департаменти ушбу тўловларни блоклаб қўйган эди. Бу эса ҳимоячи адвокатларнинг кескин эътирозларига сабаб бўлган. Хусусан, адвокат Барри Поллак ушбу чеклов туфайли Мадуро ўз хизматлари учун ҳақ тўлай олмай қолганини таъкидлади. Унинг айтишича, бу қарор Мадуронинг АҚШ Конституциясига киритилган олтинчи тузатишда белгиланган — ўзи хоҳлаган адвокатга эга бўлиш ҳуқуқига дахл қилган.

Шу билан бирга, АҚШ ҳукумати расмийлари фойдаланиш мумкин бўлган Венесуэла маблағларига маълум шартларни юклади. Жумладан, тўловлар Венесуэла ва АҚШ ўртасида дипломатик алоқалар расман қайта тикланган кун — 2026 йил 5 мартдан кейин Каракас бюджетига тушган маблағлардан тўланиши лозим.

Шунингдек, айблов ва ҳимоя томони 60 кундан кейин ишнинг боришини муҳокама қилиш учун навбатдаги мажлис ўтказишни сўрамоқда.

Мадуро ортидан пул ишлаган АҚШ ҳарбийси

23 апрель куни АҚШ Адлия вазирлиги Николас Мадурони қўлга олиш операциясида иштирок этган АҚШ армияси Махсус кучлар мастер-сержанти Ганнон Ван Дайкга айблов эълон қилганди.

Маълум бўлишича, Ван Дайк 2025 йил 27 декабрдан 2026 йил 2 январгача бўлган вақт оралиғида Polymarket платформасида Мадуро тез орада лавозимидан кетиши ва АҚШ кучлари Венесуэлага кириши бўйича 33 000 доллардан ортиқ пул тиккан. Ўша пайтда бозор бу воқеаларнинг содир бўлиш эҳтимолини жуда паст деб баҳолаган. Шу сабабли ушбу гаров қиморбоз ҳарбийга 409 минг доллар фойда келтирган.

Мадуро қўлга олинганидан сўнг, Ван Дайк маблағларни Polymarket'дан ечиб олган. Кейинчалик у ўз шахсини яшириш мақсадида платформадан ҳисобини ўчиришни сўраган. Портал эса ушбу ҳолат ҳақида Адлия вазирлигига хабар берган ва тергов билан ҳамкорлик қилган.

Манхеттен федерал суди 38 ёшли Ван Дайкка нисбатан махфий маълумотлардан шахсий манфаат йўлида ноқонуний фойдаланиш, очиқ бўлмаган маълумотларини ўғирлаш ва товарлар билан боғлиқ фирибгарлик каби айбловлар эълон қилди.

Reutersʼнинг хабар беришича, ҳарбий хизматчи жума куни 250 минг доллар гаров эвазига озод қилинган. Шимолий Каролина штатидаги судья Ван Дайкни озод қилиш ҳақида буйруқ берар экан, ундан паспортини топширишни ва ҳарбий буйруқдан ташқари ҳолларда ўқотар қуроллардан воз кечишни талаб қилди.

Ван Дайкнинг ўзи ҳозирча айбига иқрор бўлгани йўқ. У келаси ҳафта Манхеттенда унинг ишини кўриб чиқувчи АҚШ округ судьяси Маргарет Гарнетт ҳузурига келиши керак.

Мадуронинг қўлга олиниши

Венесуэла президенти Николас Мадуро ва унинг рафиқаси 2026 йил 3 январь куни АҚШ кучлари томонидан ўтказилган операцияда Каракасда қўлга олинган. Мустақил давлатнинг амалдаги президенти ва рафиқаси қўлига кишан солинган ҳолда АҚШга олиб келинган. АҚШ ички қонунлари бўйича бу «қонуний ижро», лекин халқаро майдонда бу «суверен давлатга тажовуз» ва «ўғирлаб кетиш» деб баҳоланмоқда.

Уларга Манхеттенда наркотерроризм ва кокаин контрабандасини амалга ошириш бўйича тил бириктириш, шунингдек бошқа бандлар бўйича айблов қўйилган. Мадуро ва унинг аёли ўзларини айбдор деб тан олмаган. Улар Бруклиндаги тергов ҳибсхонасида сақланмоқда. Суд жараёни бир неча йил давом этиши кутилмоқда.