Гренландия бош вазири Трампнинг оролни АҚШга сотиш ғоясини рад этди

Гренландия бош вазири Муте Эгеде АҚШ сайланган президенти Доналд Трампнинг оролга Вашингтон томонидан «эгалик ва назорат қилиш» зарурлиги ҳақидаги сўзларига жавоб қайтарди. ОАВ 23 декабр, душанба куни унинг сўзларидан иқтибос келтирди: «Гренландия Гренландия халқига тегишли».

Эгеде шундай қўшимча қилди: «Биз сотмаймиз ва сотилмаймиз. Озодлик учун узоқ давом этган курашимизни бой бермаслигимиз керак». Шу билан бирга, сиёсатчи Гренландия «бутун дунё, айниқса қўшнилар билан ҳамкорлик ва савдо қилиш учун» очиқ қолиши кераклигини таъкидлади.

Трамп: АҚШ Гренландия устидан назорат ўрнатиши керак

22 декабр, якшанба куни Доналд Трамп ўзининг Truth Social аккаунтида Қўшма Штатлар «бутун дунёда миллий хавфсизлик ва эркинликни таъминлаш» учун «Гренландияга эгалик ва назорат қилиши мутлақ зарур», деб ёзди.

Президент сифатидаги биринчи муддатида Трамп Гренландияни ўз ичига олган Данияга оролни сотишни таклиф қилган эди. Бироқ, ўшанда Копенҳаген унинг таклифини кескин рад этди ва мамлакат бош вазири Метте Фредериксен буни «бемаънилик» деб атади, шунинг учун АҚШ президенти ҳатто Данияга сафарини ҳам бекор қилди.

Вашингтоннинг Гренландияни сотиб олиш ғояси биринчи марта 1867 йилда АҚШ давлат котиби Уилям Генри Сюард томонидан таклиф қилинган, у президент Эндрю Жонсон маъмуриятида ишлаган. Ўша йили у Россиядан Аляскани сотиб олишга муваффақ бўлди.