Евроиттифоқ АҚШ билан савдо келишувини ратификация қилишни тўхтатади

“ЕХП ЕИ ва АҚШ ўртасида савдо келишувини қўллаб-қувватлайди, аммо Доналд Трампнинг Гренландия бўйича таҳдидларини инобатга олсак, ҳозирги босқичда уни маъқуллаш мумкин эмас. Америка товарларига нол тарифларни жорий этиш тўхтатилиши керак”, — деб ёзди Вебер.

Politico нашри эслатишича, келишув АҚШнинг ЕИдан импортга тарифларини 15 фоиз даражасида белгилашни кўзда тутган, бунга жавобан Европа ҳамжамияти Америка экспортига қўйилган божлардан воз кечиши керак эди.

Ушбу нашр маълумотига кўра, Европарламент АҚШдан келадиган саноат товарларига тарифларни бекор қилиш масаласида ўз позициясини белгилаши керак бўлган овоз бериш 26 январ куни кутилган. 14 январ, чоршанба куни депутатлар ратификацияни “музлатиш” бўйича қарорни кечиктирган.

Энди депутатлар битимни музлатишга тайёр эканини 21 январ куниёқ тасдиқлаши мумкин. Reuters агентлиги аниқлаштиришича, муроса ишлаб чиқилишидан олдин Вашингтон ва Брюссел ўртасида узоқ музокаралар бўлган.

“Чоршанба куни қарор қабул қилганимизда, Европарламент тариф келишувини илгари суришга ‘яшил чироқ’ ёқиши учун имконият кўрмадим. Аксинча, ЕИ президент Трампнинг тариф ҳужумларига, шу жумладан Швецияга қарши қаратилган ҳужумларга жавоб беришга тайёрланиши керак”, — деди Европарламент аъзоси, Renew Europe сиёсий гуруҳининг савдо бўйича координатори Карин Карлсбру. “Агар босим ва мажбурлаш давом этса, биз на жавоб тарифларини, na (савдо — таҳр.) ‘базука’сидан фойдаланишни истисно қила олмаймиз”, — деб қўшимча қилди у.

Бу ерда гап ЕИнинг мажбурлашга қарши инструменти — Anti-Coercion Instrument (ACI) ҳақида кетмоқда. Бу Евроиттифоқ ишлаб чиққан регламент бўлиб, ЕИга сиёсий босим ўтказаётган бирор давлатдан товар ва хизматлар импортини оператив тарзда чеклаш имконини беради. Савдо “базука”си ҳали амалда қўлланмаган.

Бундан олдин, 17 январ куни Доналд Трамп 1 февралдан бошлаб Дания, Норвегия, Швеция, Франция, Германия, Буюк Британия, Нидерландия ва Финландиядан АҚШга етказиб бериладиган барча товарларга 10 фоиз миқдорида бож жорий этилишини эълон қилди. 1 июндан эса у 25 фоизгача оширилади.

Трамп қўшимча қилишича, божлар “Гренландияни тўлиқ ва мутлақ сотиб олиш” бўйича келишувга эришилмагунча амал қилади. АҚШ президенти орол устидан назорат ўрнатиш истагини бир неча бор билдирган, у бу ғояни илк бор 2019 йилда, биринчи президентлик муддатида айтган.

Шу орада, 18 январ куни Евроиттифоқ давлатлари элчилари вазиятни муҳокама қилиш учун фавқулодда йиғилишга тўпланди.