АҚШда демократлар Гренландия сабаб жорий этилаётган божларни бекор қилишга уринади

АҚШ Конгресси Сенатидаги Демократик партия вакиллари президент Доналд Трампнинг Гренландия сабаб Европа давлатларига қарши бож жорий этиш режаларини тўхтатишга уринади. Бу ҳақда якшанба, 18 январ куни Сенатдаги демократлар озчилиги раҳбари Чак Шумер маълум қилди.

Чак Шумер Фото: J. Scott Applewhite/AP

“Доналд Трампнинг тарифлари аллақачон нархларни оширди ва иқтисодиётимизга зарар етказди, лекин энди у вазиятни янада оғирлаштиряпти. У Гренландия устидан назорат ўрнатиш бўйича ғалати уриниши учун энг яқин иттифоқчиларимизга қарши тарифлар жорий этиб, бу аҳмоқликни икки баробар қилишни хоҳлаётгани ақлга сиғмайди”, — дейилади Шумер баёнотида.

“Сенатдаги демократлар бу тарифлар Америка иқтисодиётига ва Европадаги иттифоқчиларимизга янада кўпроқ зарар етказишидан олдин, уларни тўсиб қўйиш учун қонун лойиҳасини тақдим этади”, — деб қўшимча қилди Шумер.

Ҳозир республикачилар Сенатда 100 ўриндан 53 тасига, Вакиллар палатасида эса 435 ўриндан 218 тасига эга. Демак, Доналд Трампнинг партиядошлари АҚШ Конгрессининг ҳар икки палатасини ҳам назорат қиляпти.

Бироқ Трампнинг бу режаларига нисбатан норозиликни айрим республикачилар ҳам билдирган. Масалан, Аляскадан сайланган сенатор Лиза Энн Меркауски.

“Бу тарифлар — кераксиз, жазоловчи ва чуқур даражада хато. Улар миллий хавфсизликни мустаҳкамлаш учун ҳеч нарса қилмаган ҳолда, муҳим аҳамиятга эга европалик иттифоқчиларимизни биздан янада узоқлаштиради”, — деб ёзди у X ижтимоий тармоғида. Сиёсатчининг сўзларига кўра, бу “тўғридан тўғри Путинга қўл келади”.

“НАТОдош иттифоқчиларимиз Гренландияга машғулотлар учун оз сонли ҳарбийларни юборганига, ўз иттифоқчиларимиз ҳаракатларига бундай муносабат — Америка учун, Америка бизнеси учун ва АҚШ иттифоқчилари учун зарарли. Аммо Путин, Си ва НАТОнни бўлинган ҳолда кўришни истайдиган бошқа рақиблар учун фойдали”, — деб ёзди X’да Шимолий Каролинадан республикачӣ сенатор Том Тиллис.