Сурхондарё вилояти ҳокимлиги ташаббускор тадбиркорларни қўллаб қувватлайди

Сурхондарё вилояти ҳокимлигида тадбиркор ва фермерларнинг муаммо ва таклифларини ўрганишга бағишланган очиқ мулоқот ўтказилди. Унда вилоят ҳокими Баҳодир Пўлатов, назорат қилувчи органлар, соҳага алоқадор корхона ва ташкилотлар раҳбарлари, тадбиркор ва фермерлар иштирок этди.

Мулоқот аввалида мамлакатимизда тадбиркорликни ривожлантириш ва ишбилармонларнинг эркин фаолият кўрсатиши учун яратилган имкониятлар, давлат томонидан берилган кафолатлар, соҳа ходимларининг юрт тараққиёти, аҳоли фаровонлигини юксалтиришдаги муносиб ҳиссаси ҳақида сўз юритилди. Шунга қарамай, айрим ҳолатларда тадбиркорлар билан ишлаш, уларнинг масаласини ўз вақтида ҳал этиш ёки сўровига жавоб бериш борасида сансалорлик, эътиборсизликка йўл қўйилаётганлиги таъкидланди.

Жонли ва очиқ руҳда ўтган мулоқотда тадбиркор ва фермерлар ўзларини қизиқтирган масалалар, ташвишга солаётган муаммолари юзасидан вилоят ҳокимига тўғридан тўғри мурожаат қилдилар. Уларнинг муаммоси ёки сўрови нима сабабдан ижобий ҳал этилмаётганига мутасаддилардан изоҳ сўралди.

Мулоқот давомида кўтарилган муаммо ва таклифларнинг асосий қисми шу ерда ҳал этилди. Ечими маълум вақт талаб этадиган мурожаатлар бўйича тегишли ташкилотлар раҳбарларига кўрсатмалар берилди, ижроси назоратга олинди.

Вилоят ҳокими учрашув якунида ҳам ўзи, ҳам давлат манфаати учун янги ғоя ва ташаббус билан чиқаётган ишбилармонга кўмак бериш, уни қўллаб-қувватлаш ҳар бир раҳбар ва мутасаддининг бугунги кундаги энг муҳим вазифаси бўлмоғи эканини алоҳида таъкидлаб ўтди.

Тадбиркорлик ва фермерлик фаолияти билан боғлиқ барча муаммолар бўйича Сурхондарё вилояти ҳокими Баҳодир Пўлатов билан тўғридан-тўғри алоқа ўрнатиш истагида бўлганлар учун телеграм алоқа:

ТЕЛЕГРАМ АЛОҚА:  Баҳодир Пўлатов (@surxondaryohokim)