Трамп Зеленскийни уруш бошланишига йўл қўйганликда айблади

Республикачилар партиясидан президентликка номзод Доналд Трамп Украина етакчиси Володимир Зеленскийни Россия тажовузкор бўлса ҳам, Украинада уруш бошланишига йўл қўйганликда айблади. Оқ уйнинг собиқ раҳбари машҳур ютубер Патрик Бет-Девидга интервю берди. Подкаст 17 октябр, пайшанба куни чиқди. Суҳбат чоғида Трамп Зеленский «уруш бошланишига йўл қўймаслиги керак эди», деди.

АҚШнинг собиқ президенти Украина раҳбарини «мен кўрган энг буюк сотувчилардан бири» деб атади ва Украина Қўшма Штатлардан шунчалик кўп ёрдам олаётганига ҳайрон бўлди.

«Тарихда яна ким бунча кўп пул олган?» – дея риторик савол берди у. «Бу ҳеч қачон содир бўлмаган ва бу мен унга ёрдам беришни хоҳламайман дегани эмас, чунки мен бу одамларга ҳамдардман, лекин у бу урушнинг бошланишига йўл қўймаслиги керак эди», — деди Трамп.

Зеленский аввалроқ Трамп билан НАТО мавзусини муҳокама қилганини айтди

Украина президенти Володимир Зеленский Республикачилар партиясидан АҚШ президентлигига номзод Доналд Трамп билан аввалроқ суҳбатда Украина ҳимоя бўйича НАТО аъзолигига муҳтожлигини айтган. Бу ҳақда Зеленский журналистларга 17 октябр куни Европа кенгашининг Брюсселдаги йиғилишидан кейинги якуний матбуот анжуманида маълум қилди. Украина президентидан иқтибосларни Hromadske тақдим этди.

Трамп билан суҳбат чоғида Зеленский Россия, хусусан, Будапешт меморандумининг кафолати эканини, унга кўра, ядро қуролидан воз кечиши эвазига Украинага ҳудудий яхлитлик ва суверенитетни ҳимоя қилиш ваъда қилинганини таъкидлади. Бироқ, бу Россия Федерациясининг Украинага қарши тажовузкор уруш бошлашига ва унинг ҳудудларини босиб олишига тўсқинлик қилмади.

«Бу йирик давлатлардан, бу ядровий кучлардан қайси бири жабр кўрди? Ҳаммасими? Йўқ, фақат Украина. Ким ядровий қуролдан воз кечди? Ҳаммасими? Йўқ, фақат Украина. Бугун ким жанг қилмоқда? Украина. Доналд Трамп билан суҳбатда мен унга шундай дедим: «Чиқиш йўли қандай? Ёки Украина ядро қуролига эга бўлади – бу биз учун ҳимоя – ёки бизда қандайдир алянс бўлиши керак». Биз бугун НАТОдан бошқа ҳеч қандай самарали алянсни кўрмаяпмиз», дея Украина президенти ўз суҳбати тафсилотларини маълум қилди. У Украина ядро қуролини эмас, НАТОни танлашини ва Трамп уни «эшитиб», «Сизда адолатли далиллар бор», деганини қўшимча қилди.