Central Asian University минтақадаги йирик технологик тадбирда 17 мамлакат ва 1 200 нафар иштирокчини бирлаштиради

Тадбирларда 1 200 нафардан ортиқ иштирокчи, 300 дан зиёд жамоа ҳамда 17 мамлакатдан, жумладан, 200 дан ортиқ университет ва таълим муассасаси вакиллари қатнашади.

CAU муҳандислар, дастурчилар ва технология етакчилари учун ҳар йили ўтказиладиган халқаро майдонни шакллантирмоқда. Бу шундай маконки, унда ғоялар реал босим шароитида синовдан ўтказилади, иқтидор эса амалий натижалар билан тасдиқланади.

Global Tech Summit 2026 университетлар, технология компаниялари, инвесторлар ва давлат тузилмалари вакиллари ўртасида стратегик мулоқот платформаси бўлади. Муҳокамалар марказида минтақа учун барқарор сунъий интеллект инфратузилмасини шакллантириш, технологияларни тартибга солиш, рақамли суверенитет ва сунъий интеллект даврида инсон капиталини ривожлантириш масалалари туради.

CAU Tech Hackathon 2026 учта йўналишда ўтказилади: AI in Healthcare, Cybersecurity CTF ва Robotics Challenge. AI in Healthcare ҳамда Cybersecurity CTF йўналишлари университет талабаларига мўлжалланган бўлиб, 17 мамлакатдан 900 нафардан ортиқ талабани ўз ичига олган 228 та жамоани бирлаштиради.

Иштирокчилар орасида Ўзбекистон, Ҳиндистон, Озарбайжон, Қирғизистон, Қозоғистон, Ветнам, Россия, Арманистон, Бангладеш, Индонезия, Туркия, Филиппин, Тожикистон, БАА, Шри-Ланка, Корея Республикаси ва АҚШ университетлари вакиллари бор. Бу ерда реал кейслар, қатъий дедлайнлар ва ечимларни халқаро ҳакамлар ҳайъати олдида ҳимоя қилиш талаб этилади. Бу ерда назария эмас, ижро ғалаба қозонади.

10–11-синф ўқувчилари учун мўлжалланган Robotics Challenge йўналиши Ўзбекистон, Қозоғистон ва Қирғизистондан 73 та жамоани жамлайди. Мусобақалар CAU кампусида икки муҳандислик тоифаси — Mini Sumo ва Line Following бўйича ташкил этилади.

Mini Sumo — автоном роботлар мусобақаси бўлиб, унинг вазифаси масофадан бошқарувсиз, тўлиқ датчиклар, навигация алгоритмлари ва хулқ-атвор стратегиясига таянган ҳолда ринг ичидаги рақибни аниқлаш ва уни майдон чегарасидан чиқариб юборишдан иборат.

Line Following — мобил роботларни дастурлаш бўйича мусобақа бўлиб, унда роботлар тасвирни аниқлаш тизимлари, сенсорларни калибрлаш ва ҳаракатни оптималлаштириш орқали белгиланган чизиқ бўйлаб мураккаб трассани имкони қадар аниқ ва тез босиб ўтишлари лозим.

Ҳар икки тоифа алгоритмик фикрлаш, мехатроника, дастурлаш ва муҳандислик лойиҳалаш кўникмаларини реал рақобат босими шароитида ривожлантиришга қаратилган.

Ҳакатон ва саммитда турли мамлакатлардан 50 нафардан ортиқ ментор, соҳа эксперти ва технология мутахассиси иштирок этади. Халқаро ҳакамлар ҳайъати ва маърузачилар академик, корпоратив ҳамда тадқиқот тузилмалари вакилларидан иборат бўлиб, бу лойиҳаларнинг объектив баҳоланиши ва жаҳон стандартларига мувофиқлигини таъминлайди.

Лойиҳаларни доктор Амир Шарафханеҳ (АҚШ), Yale University профессори Винсент Вилчинский (АҚШ) ва Cisco Networking Academy вакили Надин Котб (Миср) каби жаҳон даражасидаги мутахассислар баҳолайди.

Global Tech Summit 2026 “AI Beyond Hype: реал технологиялар, реал ечимлар” мавзусида ўтказилади. Саммит сунъий интеллект инфратузилмаси, робототехника, рақамли трансформация, технологик дипломатия, сунъий интеллектни тартибга солиш ва венчур инвестициялар соҳасидаги экспертларни бирлаштиради. Дастурдан мавзули сессиялар ҳамда Марказий Осиёнинг рақамли суверенитетига бағишланган халқаро панел ўрин олган.

Sebastian Thrun — Stanford University профессори, Udacity асосчиси ва Google X ҳаммуассиси — CAU Tech Summit 2026’нинг махсус меҳмони сифатида Ўзбекистонга илк бор ташриф буюради.

CAU Tech Hackathon 2026’ни ўтказиш Central Asian University’нинг таълим ва клиник муҳитда амалий сунъий интеллект, муҳандислик ва рақамли технологияларни ривожлантиришга қаратилган узоқ муддатли стратегиясининг бир қисми ҳисобланади. Университет сунъий интеллектни тиббиёт дастурлари, муҳандислик йўналишлари ва тадқиқот ташаббусларига тизимли равишда интеграция қилган ҳолда, таълим, фан ва саноат технологияларини амалиётга жорий этишнинг ягона мантиғи асосида ишлайдиган экотизимни шакллантирмоқда.

CAU Tech Hackathon ва Global Tech Summit 2026 мактаб ўқувчилари, талабалар, тадқиқотчилар ва саноат вакилларини бирлаштириб, минтақа учун янги технологик экотизим яратади. Бу тадбирлар мусобақа ва анжуман доирасидан чиқиб, Марказий Осиёнинг янги технологик архитектурасига пойдевор қўяди.

Савол ва таклифлар бўйича: +998954304004

Central Asian University ҳақида

2019 йилда Ўзбекистонда ташкил этилган Central Asian University мамлакатдаги энг жадал ривожланаётган хусусий университетлардан бири ҳисобланади. Университет тиббиёт, стоматология, бизнес, архитектура ва дизайн, муҳандислик, туризм ва меҳмонхона бошқаруви йўналишларида халқаро таълим дастурларини таклиф этади.

Central Asian University “Round University Ranking 2025” жаҳон рейтингида топ-1000 таликка кирган, “THE Impact Rankings 2025” рейтингида дебют қилган, “Science and Innovation Awards” талқинига кўра “Ўзбекистоннинг 2024 йилдаги энг инновацион университети” деб топилган ҳамда “AD Scientific Index” бўйича “Ўзбекистоннинг 2025 йилдаги илк ёш университети” сифатида эътироф этилган. Шунингдек, университет “QS Stars” халқаро баҳолаш тизимида 4 юлдузга сазовор бўлган.

Университет Германия, Швейцария, АҚШ ва бошқа мамлакатлар университетлари билан қўшма академик ва тадқиқот лойиҳаларини амалга оширмоқда.

Call-марказ: 71-208-12-34

Сайт | Instagram | Telegram

Реклама ҳуқуқи асосида