Энди АҚШ банкнотларида Доналд Трампнинг ҳам имзоси бўлади

Ғазначилик департаменти 2026 йил июндан бошлаб АҚШ банкнотлари – қоғоз пулларида президент Доналд Трампнинг имзоси акс этишини маълум қилди. Бу Америка тарихида амалдаги президентнинг имзоси миллий валютада пайдо бўладиган илк ҳолатдир.

100 долларда акс етган АҚШ ғазначисининг имзоси / Фото: Kun.uz

Трампнинг имзоси Ғазначилик котиби Скотт Бессентнинг имзоси билан ёнма-ён жойлаштирилади. АҚШ Ғазначилик департаментнинг билдиришича, ушбу мисли кўрилмаган қадам Американинг 250 йиллик юбилейини нишонлаш мақсадида ташланмоқда.

«Буюк мамлакатимиз ва президент Доналд Трампнинг тарихий ютуқларини эътироф этиш учун унинг исми туширилган АҚШ долларидан кўра кучлироқ восита йўқ», деди Скотт Бессент.

Reuters’нинг ёзишича, Трамп ва АҚШ Ғазначилик котиби Скотт Бессентнинг имзолари туширилган дастлабки 100 долларлик купюралар июнь ойида босиб чиқарилади, кейинги ойларда эса бошқа номиналлар ҳам муомалага чиқарилади. Янги пулларнинг банклар орқали кенг муомалага кириши бир неча ҳафта вақт олиши мумкин.

Ғазначилик расмийларининг сўзларига кўра, банкнотларнинг умумий дизайни ўзгармайди, фақат ғазначи имзоси ўрнига Трампнинг имзоси қўйилади. Трамп имзоси туширилган 100 долларлик купюранинг макети ҳозирча оммага тақдим этилмади.

**Трамп ўзи имзолаган ҳужжатни кўрсатмоқда / Фото: Getty Images**

Америка мустақиллигининг 250 йиллиги муносабати билан режалаштирилган янги дизайндаги банкнотлардан, шунингдек, сўнгги 165 йил ичида биринчи марта АҚШ ғазначисининг имзоси олиб ташланади. Ғазначи бевосита Ғазначилик котибига ҳисоб беради ҳамда АҚШ зарбхонаси ва бошқа ғазначилик функцияларини назорат қилади.

Ҳозирда Ғазначилик собиқ президент Жо Байден давридаги Ғазначилик котиби Жанет Елен ва собиқ ғазначи Лин Малерба имзолари туширилган банкнотларни чиқаришда давом этмоқда.

Reutersʼнинг ёзишича, имзо билан боғлиқ бу ўзгариш Трамп маъмурияти ва унинг иттифоқчилари томонидан президент исмини бинолар, муассасалар, давлат дастурлари, ҳарбий кемалар ва тангаларга бериш борасидаги навбатдаги ҳаракатидир. Ўтган ҳафтада Трамп томонидан тайинланган федерал санъат ҳайъати унинг тасвири туширилган эсдалик олтин танга дизайнини тасдиқлаган эди.

Шунингдек, муомалада бўладиган 1 долларлик Трамп тангасини чиқаришга уринишлар АҚШ тангаларида тирик шахсларни тасвирлашни тақиқловчи қонунлар туфайли тўхтаб қолган эди.

«Энди америкаликлар озиқ-овқат, бензин, ижара ва соғлиқни сақлаш учун кўпроқ пул тўлаётганларида айнан кимни айблашни аниқ билиб олишади», дея Калифорния губернатори Гевин Нюсом бу қарорни танқид қилди.