Туркияда 3 нафар полиция ходими ИШИДга қарши операция чоғида ҳалок бўлди

Туркия куч тузилмалари 29 декабр – душанба куни Мармара денгизи соҳилидаги Ялова шаҳридаги уйлардан бирида терроризмга қарши операция ўтказди. Ички ишлар вазири Али Ерликаянинг маълум қилишича, ҳужум чоғида камида олти нафар ИШИД жангарилари ўлдирилди.

Шунингдек, Ерликая – террорчилар полициячиларга ўт очганидан сўнг уч нафар полиция ходими ҳам ҳалок бўлганини билдирди. Яна саккиз нафар полициячи ва бир нафар хавфсизлик ходими ҳам яраланган.

Полиция Яловадаги уйга жангарилар у ерда тунаб қолган бўлиши мумкин деган гумон билан бостириб кирган. Операция давомида вақти-вақти билан отишма товушлари эшитилиб турган. Reuters мухбирининг воқеа жойидан хабар беришича, рейд деярли саккиз соат давом этган.

Нашрнинг ёзишича, полиция тонг саҳарда ушбу уйга олиб борувчи йўлни ёпиб қўйган. «Яқин атрофдаги ёнғиндан тутун кўтарилаётган эди, полиция вертолёти ҳавода парвоз қилиб турганди», дейди гувоҳлар.

Полиция ҳужумда ўлдирилган 6 жангарининг барчаси Туркия фуқароси бўлганини маълум қилди. Шунингдек, уйдан беш нафар аёл ва олти нафар бола тирик чиқариб олинган.

Жорий йилда Туркия «ИШИД»га аъзоликда гумон қилинаётган жангариларига қарши амалиётларни кучайтирди, чунки гуруҳ глобал миқёсда яна фаоллашган.

Хусусан, ўтган ҳафта Туркия полицияси Янги йил байрамида ҳужумлар уюштиришни режалаштирганликда гумон қилинган 115 кишини қўлга олганди. Сўнгги бир ой ичида полиция жами 138 кишини ҳибсга олди. Душанба тонгида эса Туркия бўйлаб 15 вилоятдаги 108 та манзилда бир вақтнинг ўзида операция ва тинтувлар ўтказилган.

Глобал миқёсда фаоллашган ИШИДга қарши АҚШ ҳам амалиётлар ўтказмоқда. Хусусан, ўтган ҳафтада Нигериянинг шимоли-ғарбида ушбу гуруҳ жангариларга зарба берди. 19 декабрь куни эса АҚШ ҳарбийлари Сурия ҳудудида «ИШИД»нинг ўнлаб нишонларига кенг кўламли зарбалар берди.

Туркия президенти Ражаб Тоййиб Эрдўған ҳалок бўлган полициячиларнинг оилаларига таъзия билдирди. «Халқимиз тинчлиги ва давлатимиз хавфсизлигига таҳдид солаётган қўли қон бўлган ёвузларга қарши кураш мамлакат ичида ҳам, ташқарисида ҳам давом этади», деди Эрдўған.