Австралиядан бошпана сўраган эронлик футболчилардан 3 нафари ватанга қайтишга қарор қилди

Бу эса шуни англатадики, Осиё кубоги доирасида Австралияга борган ва маҳаллий расмийлардан бошпана сўраган етти футболчидан фақат уч нафари ўша ерда қолмоқда. Ўтган ҳафта чоршанба куни яна бир футболчи қиз Эронга қайтишга қарор қилганди.

Эрон диаспораси вакилларидан бирининг сўзларига кўра, Заҳро Султон Мешкеҳкар, Мона Хамуди ва Заҳро Сарбали каби футболчилар Австралиядан бошпана сўраш бўйича сўровини қайтариб олган.

Австралия ички ишлар вазирлиги вазият юзасидан изоҳ бераркан, унинг ҳукумати ушбу аёллар мамлакатда хавфсиз келажакка эга бўлиши учун барча имкониятни ишга солганини айтган.

«Австралия ҳукумати фақат имкониятдан фойдаланишни таъминлаши ва уларни тушунтириши мумкин, аммо биз спортчиларга бундай оғир қарорлар қабул қилишга тўғри келадиган вазиятни ўзгартиришга қодир эмасмиз», – деган Тони Бёрк ўз баёнотида.

Аввалроқ бу маълумотни Эрон спорт вазирлиги ҳам тасдиқлаганди.

«Футбол бўйича Эрон аёллар жамоасининг миллий руҳи ва ватанпарварлиги душманларнинг режаларини йўққа чиқарди», – дейилади вазирлик баёнотида. Унда Австралия ҳукумати «Трампнинг ноғорасига ўйнаш»да  айбланган.

Ислом инқилоби муҳофизлари корпусига алоқадор ҳисобланган Tasnim агентлиги хабарида жамоанинг учала аъзоси ҳам Малайзия пойтахти Куала-Лумпур шаҳрида жамоанинг қолган аъзоларига қўшилиши ҳамда «Австралияда бошпана сўровини қайтариб олишгани туфайли ўз оилалари бағрига қайтаётгани» айтилган.

Бу футболчилар билан нималар бўлиб ўтди?

Футбол бўйича Эрон аёллар жамоаси уруш бошланишидан олдинроқ Австралияга учиб кетганди, аммо 2 март Жанубий Кореяга қарши илк ўйин учун майдонга тушганида аллақачон ҳарбий ҳаракатлар бошланганди.

Эронлик футболчилар миллий мадҳия янграганида жим туришди. Ушбу ҳолат видеоёзуви ижтимоий тармоқларда кенг тарқалди ва жамоа аъзоларининг бу ҳаракати Эрон ҳукуматига қарши норозилик акцияси сифатида қабул қилинди.

Мамлакатдаги расмий нашрлар бунга ҳаддан ташқари салбий муносабат билдирди: машҳур телебошловчилардан бири аёллар футбол жамоасининг ҳаракатини «уруш давридаги шарафсизлик ва ватанпарварлик йўқлигининг олий чўққиси» деб баҳолади. У шунингдек футболчиларга «ҳарбий давр хоинлари»га қарагандек қарашга чақирган.

Бу воқеалардан кейин Австралия ҳукуматидан Эрон жамоаси аъзолари Австралияда қолишни хоҳлайдиган бўлишса, уларга бошпана бериш тартибини соддалаштириш сўралган онлайн-петиция пайдо бўлди.

CNN телекомпания жамоага яқин бўлган манбага таяниб хабар беришича, Эрон ҳукумати спортчиларни синчковлик билан кузатган – уларга «Ислом инқилоби муҳофизлари корпусига алоқадор шахслар бириктирилган».

Нашр манбасига кўра, Австралияга қарши иккинчи ўйин олдидан футболчиларга босим ўтказилган – уларга оила аъзолари ҳаёти билан таҳдид қилинган. Шунинг учун улар ҳукуматни қўллашини кўрсатишга мажбур бўлишган.

Натижада Австралия ва Филиппинга қарши ўйинлар олдидан аёллар нафақат мадҳияни куйлашган, балки ҳарбийча салом ҳам беришган.

9 март куни эронлик футболчилардан беш нафари жамоа жойлашган меҳмонхонани тарк этган ва Австралия ҳукумати томонидан тақдим этилган хавфсиз жойга етиб келган.

Кейинги куни Эрон делегацияси таркибидаги яна икки аёл бошпана сўраб мурожаат қилган, аммо бир неча соат ўтиб улардан бири қарорини ўзгартириб, жамоа базасига қайтишга қарор қилганди.