Хитой коронавирусдан вакцинани биринчи навбатда Африкага беришга ваъда берди

Фото: REUTERS

Хитой раиси Си Цзиньпин коронавирусдан вакцина ишлаб чиқилгандан кейин уни биринчи навбатда Африка давлатларига беришга ваъда берди.

“Хитой коронавирусдан вакцина ишлаб чиқилиб, қўлланиши бошлангандан кейин Африка давлатлари ушбу воситадан фойдалана оладиганлар орасида биринчилардан бўлишига ваъда беради”, деб айтган Си Цзиньпин. Хитой раиси буни Хитой ва Африканинг коронавирусга қарши биргаликдаги кураши бўйича видеоанжуман шаклида ўтказилган саммитида маълум қилган.

Си Цзиньпиннинг таъкидлашича, Пекин Хитой-Африка дўстлиги госпиталлари қурилишини тезлаштиради ва Хитой ҳамда Африка шифохоналари ҳамкорлигини фаоллаштиради.

Аввалроқ Хитой коронавирусдан вакцинани бутун дунёга беришни режалаштираётганини маълум қилган.