Филлар тўдаси америкалик миллионер-овчини топтаб ўлдирди

Миллионер ва унинг ҳамроҳи ўрмонда ов қилиш чоғида бешта фил ва фил боласига дуч келган. Уларнинг қўлидаги қуролларни кўрган филлар дарҳол ҳужумга ўтган.

Фото: Bobby Hansen Hunting Safaris

Габонда филлар тўдаси америкалик миллионерни ов қилаётган вақтида топтаб ўлдирди, деб хабар берди Daily Mail газетаси Collect Africa саёҳат компаниясига таяниб.

"Африкада бешта фил антилопа овлаётган америкалик миллионерни топтаб ўлдирди", — дейилади нашр хабарида.

Хабарда айтилишича, ҳалок бўлган миллионер Калифорнияда токзорига эга бўлган 76 ёшли Эрни Дозио бўлиб, у ўнлаб йиллардан буён Африка ва Америкада экзотик жониворларни овлаш билан шуғулланиб келган.

Дозио ва унинг ҳамроҳи ўрмонда ов қилиш чоғида бешта фил ва фил боласига дуч келган. Уларнинг қўлидаги қуролларни кўрган филлар дарҳол ҳужумга ўтган.

Ҳужум оқибатида миллионер ҳалок бўлган, ҳамроҳи эса жароҳатланган, деб ёзади газета Дозио билан таниш бўлган кейптаунлик собиқ овчининг сўзларига асосланиб.