«АҚШ Россиянинг позициясини эшитмоқда». Путиннинг элчиси Вашингтондаги учрашувлар натижалари ҳақида гапирди

У айнан ким билан учрашганига аниқлик киритмаган, Дмитриев Трампнинг махсус вакили Стив Уиткофф билан учрашгани норасмий равишда маълум қилинган.

«Биз [46-] президент [Жо] Байдендан фарқли ўлароқ, президент Трамп маъмурияти масалаларни ҳал қилишга интилаётганини аниқ кўрмоқдамиз. Улар ўзларини жуда ҳурмат билан тутишади, Россиянинг позициясини тушунишади, кўп саволлар беришади, муросага келишади. Бу бизга берилган руҳ, яратувчанлик», – деди у журналистларга.

Дмитриевнинг сўзларига кўра, Россия-Америка муносабатларини тиклаш музокараларнинг асосий мавзуларидан бўлган.

«Президент Трамп маъмурияти Россия-АҚШ муносабатларининг барча масалаларини ҳал қилишни мақсад қилган. Шубҳасиз, улар геосиёсий масалаларни ҳал қилишга интилишмоқда, улар Россиянинг кўплаб масалалар бўйича позициясини эшитишмоқда», – дея қўшимча қилди у.

Шунингдек, Дмитриёв Россия ва АҚШ ўртасида тўғридан тўғри ҳаво қатновини тиклаш имконияти ҳақида гапирди, у ковид пандемияси бошида узилиб қолган ва Россиянинг Украинага кенг кўламли босқини бошлангач, қайта тикланмаганди.

«Аслида, тўғридан тўғри авиақатновларни тиклаш устида иш олиб борилмоқда ва биз бу масалада олдинга силжишга умид қиламиз», – деди РФПИ раҳбари.

Дмитриевнинг айтишича, учрашувларда Арктикадаги ва камёб ер металларини қазиб олишдаги ҳамкорлик муҳокама қилинган, бу ҳақда Кремлнинг Трамп маъмурияти билан аввалги алоқаларидан кейин айтиб ўтилган.

«Биз барча келишмовчиликларимизни ҳал қилишимиз учун яна бир қатор учрашувлар ўтказишимиз керак», – деди Россия президенти вакили.

Кирилл Дмитриев Украинада уруш бошланганидан бери Вашингтонга ташриф буюрган энг юқори мартабали россиялик амалдор бўлди.

Оқ уй музокаралар натижаларига ҳозирча изоҳ бермади.

Bloomberg агентлигининг музокаралар жараёнидан хабардор манбага таяниб хабар беришича, томонлар кейинги ҳаракатларни бошлашидан олдин АҚШ Дмитриев Путинга ташриф натижалари ҳақида ҳисобот беришини кутмоқда.

Пайшанба куни Bloomberg Россия ҳали ҳам Доналд Трамп Украинада мақбул тинчлик келишувини таъминлашига умид қилаётгани, бироқ музокаралар муваффақиятсизликка учраса, урушни давом эттиришга тайёрлигини ёзганди.

Нашр суҳбатдошларининг сўзларига кўра, Кремл Трампнинг ўт очишни тўхтатиш масаласида олдинга силжиш бўлмаган тақдирда Россия нефти харидорларига қарши иккиламчи санкциялар жорий этиш билан қилган таҳдидидан хавотирда эмас.

Трампнинг ёрдамчилари, жумладан, Стив Уиткофф ҳам Россия билан музокараларда олдинга силжишга оптимистик муносабат билдирган. Шу билан бирга, сўнгги кунларда тинчлик йўли билан ҳал қилиш бўйича аниқ қадамлар ҳақида хабар берилмади.

«Оқ уй 20 апрелга қадар сулҳ бўйича келишувга эришишни мақсад қилганди, бироқ энди бу мақсад амалга ошиши даргумон, Трамп ва Путин ўртасида яқин орада ўтказилиши мумкин бўлган саммит ҳақидаги гап-сўзлар эса сўнгги вақтларда тиниб қолган», – деб ёзади Bloomberg.

Кремл матбуот котиби Дмитрий Песковнинг агентликка маълум қилишича, Россия «муаммони ҳал қилиш учун маълум ўзаро саъй-ҳаракатларни давом эттиришни афзал кўради».

«Ҳамма жанжаллашишни эмас, балки гапиришни ва нафақат гапиришни, балки тинглашларини ҳам афзал кўради – бизда Американинг ҳозирги Америка маъмурияти билан шундай нарса бор», – деди Песков.

Bloomberg гарчи Россия жанг майдонида олдинга силжиётган ва Украинага нисбатан жонли куч ва қурол-яроғ бўйича устунликка эга бўлса-да, ғарблик таҳлилчиларда руслар улкан йўқотишларга учраётгани ҳақида маълумот борлигини эслатган.

NBC News маъмурият вакилларига таяниб хабар беришича, Трампнинг атрофидагилар Россия президенти ўт очишни тўлиқ тўхтатиш мажбуриятини олмагунча, унга Владимир Путин билан гаплашмасликни маслаҳат бермоқда.

Якшанба куни Трамп NBC News телеканалига интервюсида Путин билан шу ҳафта гаплашишни режалаштираётганини айтганди.