Эронда «Оскар»га номзод бўлган филм ижодкорларидан бири ҳибсга олинди

«Оддий тасодиф» филми сценарийси муаллифларидан бири Меҳди Маҳмудиён Теҳронда ҳибсга олинди. Бу ҳақда Associated Press ва The New York Times нашрлари қароргоҳи АҚШда жойлашган Human Rights Activists News Agency ҳуқуқ ташкилотига асосланиб хабар тарқатди.

Филм ижодкорларига кўра, Маҳмудиён 31 январ куни қўлга олинган. Унга айнан қандай айблов эълон қилингани маълум эмас. BBC Persian маълумотига кўра, Маҳмудиён ҳибсга олингани ҳақида хабар бериш учун адвокати билан гаплашишга ва оиласи билан боғланишга муваффақ бўлган, аммо у ҳозир айнан қаердалигига аниқлик киритилмаган.

28 январ куни Маҳмудиён ва яна 16 киши Эрон олий раҳнамоси оятуллоҳ Али Хоминаий намойишлар куч билан бостирилгани учун қораланган баёнотга имзо чекканди. AP хабарига кўра, имзо қўйганлардан яна икки нафари ҳибсга олинган.

«Оддий тасодиф» филми режиссёри, ҳозирда хорижга чиқиб кетган Жаъфар Панаҳий Маҳмудиённи қўллаб-қувватлаб баёнот берган. «Меҳди Маҳмудиён – шунчаки инсон ҳуқуқлари ҳимоячиси ва виждон маҳбуси эмас; у гувоҳ, тингловчи ва нодир ахлоқ намунаси – қамоқхона деворлари ичида ҳам, ташқарисида ҳам йўқлиги дарҳол сезиладиган инсон», – дейди у.

Эронлик режиссёр Жаъфар Панаҳий «Оддий тасодиф» филми дунё прокатига 2025 йил майида чиққанди – бу унинг қамоқдан чиққанидан кейинги илк картинаси бўлганди, у  «тизимга қарши тарғибот»да айбланиб қамалганди. Эронда ушбу филм намойиши тақиқланган. Филм сюжети эронлик собиқ сиёсий маҳбуснинг кечинмалари ҳақида ҳикоя қилади, у озодликка чиққанидан кейин ўзига ёмонлик қилганларни учратади ва улардан қасос олишга қарор қилади.

2025 йилда «Оддий тасодиф» филми Канн кинофестивалида «Олтин палма япроғи» мукофотини қўлга киритди. Картина икки номинацияда — «Энг яхши сценарий» ва «Хорижий тилдаги энг яхши филм» йўналишларида «Оскар»га ҳам номзод сифатида кўрсатилган.