Трамп: АҚШ ҳукумати расман фақат иккита жинсни - эркак ва аёлни тан олади

АҚШ сайланган президенти Доналд Трамп лавозимга киришган кунидаёқ «трансгендер аҳмоқликни тўхтатишга» ваъда берди, чунки республикачилар Конгресснинг иккала палатасини ва Оқ уйни назорат қилади, деб хабар берди «Америка Овози».

«Мен болаларнинг жинсий майиб қилинишига чек қўйиш, ҳарбийлар ҳамда бошланғич, ўрта мактабларда трансгендер сиёсатига барҳам бериш тўғрисидаги буйруқни имзолайман», деди Трамп Аризона штатининг Феникс шаҳрида ёш консерваторлар учун ўтказилган тадбирда.

У, шунингдек, «эркакларни аёллар спортига яқинлаштирмасликка» ваъда берди ва «АҚШ ҳукумати фақат икки жинс — эркак ва аёлни расман тан олишини» қўшимча қилди.

AP VoteCast сўровига кўра, 120 мингдан ортиқ америкаликлар трансгендерларнинг ҳуқуқларини ҳукумат томонидан қўллаб-қувватланиши ва уларни жамоатчилик томонидан қабул қилинишини «ҳаддан ташқари ошиб кетган» деб ҳисоблайди. Уларнинг аксарияти Доналд Трамп тарафдорлари.

Трампнинг биринчи президентлик муддати давомида Оқ уй «жинс» таърифини «биологик жинс» деб талқин қилган бўлса, Жо Байден маъмурияти буни «гендер идентификатори» деб талқин қилган.