ЕТТБ «Ипотека-банк»ка 30 млн доллар тақдим этади

«Ипотека-банк» АТИБ ва ЕТТБ ўртасида кичик бизнес лойиҳаларини молиялаштириш ва савдо молиялаштириш бўйича битимлар имзоланди.

ЕТТБ «Ипотека-банк» АТИБга 30 млн АҚШ доллари миқдорида кредит линиясини тақдим этиш тўғрисида қарор қабул қилди.

2017 йил 20 декабрь куни «Ипотека-банк» бош офиси биносида «Ипотека-банк» АТИБ ва ЕТТБ ўртасида кредит битимларини имзолаш маросими бўлиб ўтди.

Имзолаш маросимида «Ипотека-банк» АТИБ раҳбарияти ва ЕТТБ молия институтлари билан ишлаш бўйича департаменти директори Ник Тессиман бошчилигидаги ЕТТБ делегацияси вакиллари, оммавий ахборот воситалари вакиллари иштирок этдилар.

«Ипотека-банк» томонидан битимларни Бошқарув раиси О.Мусаев, ЕТТБ томонидан Н.Тессиман имзолади.

Кредит битимлари тўплами Ўзбекистон Республикаси ҳудудида кичик бизнесни қўллаб-қувватлаш учун 25 млн долларлик кредит линияси, шунингдек 5 млн АҚШ доллари миқдорида савдо молиялаштирилиши дастуридан иборат.

Мазкур битимлар Ипотека-банкка Ўзбекистон Республикасининг барча ҳудудларида жойлашган филиаллари кенг тармоғи орқали ЕТТБ линияси бўйича молиявий маблағларни мамлакат бўйлаб кичик бизнеснинг энг талабгир лойиҳаларига йўналтириш имконини беради, бу ушбу соҳани ривожлантиришга ва уларнинг мақсадларига эришишга кўмаклашади.

Шу билан бирга, савдо молиялаштирилиши бўйича битимлар «Ипотека-банк»ка мамлакат ва хориждаги корхоналар ўртасида савдо алоқаларини ривожлантириш, шу тариқа минтақавий интеграция ва корреспондентлик банк хизматларини ривожлантиришга имкон беради.

Ҳозирги вақтда ушбу кредит линияси Ўзбекистон ҳудудларида 70 фоиз ва Тошкент шаҳридаги «Ипотека-банк»нинг филиаллари томонидан 30 фоизда ўзлаштирилиши кутилмоқда. Кичик бизнес лойиҳаларини молиялаштиришнинг максимал суммаси бир қарз олувчи учун 1,5 млн АҚШ долларини ташкил этади.

«Ипотека-банк» АТИБ Ўзбекистон республикасининг энг йирик банклари тўртлигига киради ҳамда етакчи молия муассасаларидан бири саналади. Ипотека-банкнинг жорий йил 11 ойидаги молиявий кўрсаткичларидан келиб чиқиб, шуни таъкидлаб ўтиш мумкинки, банкнинг соф активлари 12,9 трлн сўмни ташкил этди. Бу жорий йилнинг бошидан бери активлар 125,7 фоизга ўсганини англатади. Банк кредит маблағлари қарийб 10 трлн сўмни ташкил этди (ўсиш 117,8 фоиз). Банкнинг умумий капитали 1,2 трлн сўмдан ошди, бу кўрсаткич 2017 йилнинг 1 январи билан таққослаганда 173,1 фоизга ўсди.

«Ипотека-банк» ва ЕТТБнинг шериклик муносабатлари 2004 йилда шакллана бошлади, ўшанда «Ипотека-банк» кичик бизнес субъектларини молиялаштириш учун ЕТТБ кредит линиясини олди.

ЕТТБ Марказий Осиёдаги энг йирик институционал кредит берувчи саналади, инфратузилмадан бошлаб қишлоқ хўжалигига қадар, хусусий секторни ривожлантиришга йўналтирилган турли соҳалардаги лойиҳаларни амалга оширишга 11,6 млрд евро (12.3 млрд доллар) тақдим этилган. Хусусан, ЕТТБ Ўзбекистонда 1992-2010 йилларда умумий суммаси 894 млн еврони ташкил этган 54 лойиҳани молиялаштирди.