Россияда тиббий кўрикдан ўтишдан бош тортган мигрантлар учун жарима 12,5 баравар оширилади

Чет эл фуқаролари ёки фуқаролиги бўлмаган шахслар тиббий кўрикдан ўтишдан бош тортган ёки бўйин товлаган тақдирда 25 мингдан 50 минг рублгача жарима тўлаши керак бўлади. Бундай қоидага эга қонун лойиҳаси 10 феврал куни Россия Давлат Думаси депутатлари томонидан биринчи ўқишда маъқулланди.

Ҳозир Россия қонунчилигига кўра, жараёндан бўйин товлаганлик учун 2-4 минг рубл миқдорида жарима кўзда тутилган. Маъмурий жавобгарликнинг яна бир чораси сифатида ҳужжат Россиядан чиқариб юборишни белгилайди. Агар чет эллик белгиланган муддатда жаримани тўламаса, унга икки баравар миқдорда жарима солинади ва мажбурий равишда маъмурий чиқариб юборилади.

Лойиҳага кўра, мигрантларнинг шифокор кўрсатмасисиз гиёҳвандлик воситалари, психотроп моддалар ёки потенциал хавфли психоактив моддаларни истеъмол қилишини, шунингдек, уларда юқумли касалликлар ва ОИВ инфекцияси мавжудлигини тиббий текширувдан ўтказиш тартибини бузганлик учун маъмурий жазо жорий этиш назарда тутилмоқда. Бунинг учун ташкилотлар 1 млн рублгача жаримага тортилади ёки 90 суткагача мажбурий равишда ишини тўхтатиб туради.

Шунингдек, ҳужжат мигрантлар Россия ҳудудига киргандан кейин тиббий кўрикдан ўтиши шарт бўлган муддатни 90 кундан 30 кунгача қисқартиришни назарда тутади. Бундан ташқари, мамлакатда 30 кундан ортиқ бўлган хорижликлар учун ҳар йили мажбурий тиббий кўрикдан ўтиш жорий этилади.

Қонун лойиҳасини Дума спикери Вячеслав Володин, шунингдек, Дума фракциялари раҳбарлари ва Дума раиси ўринбосари Ирина Яровая бошчилигидаги 427 нафар депутатдан иборат гуруҳ киритди.

«Таклиф этилаётган чора-тадбирлар мигрантлар устидан назоратни кучайтириш ва мамлакатимизда жамоат хавфсизлигини оширишга қаратилган», деди Володин.