Жаҳон чемпионатида аккредитациядан ўтган шахслар ҳамда ўйин кунлари чипталари мавжуд бўлган шахслар учун жамоат транспортидан (автобус, метро) бепул фойдаланиш имконияти яратилади.
“2024 йилги футзал бўйича жаҳон чемпионатига тайёргарлик кўриш ва ўтказиш чора-тадбирлари тўғрисида”ги президент қарори қабул қилинди.
Андижон, Бухоро ҳамда Тошкент шаҳарларида 2024 йил 14 сентябр - 6 октябр кунлари бўлиб ўтадиган 2024 йилги футзал бўйича жаҳон чемпионатига муносиб тайёргарлик кўриш, уни юқори даражада ташкил этиш ва ўтказиш мақсадида қуйидагилар тасдиқланди:
- 2024 йилги футзал бўйича жаҳон чемпионатига тайёргарлик кўриш ва ўтказиш бўйича ташкилий қўмита таркиби;
- 2024 йилги футзал бўйича жаҳон чемпионатига тайёргарлик кўриш ва ўтказиш бўйича чора-тадбирлар режаси.
2024 йил июн ва август ойларида жаҳон чемпионати бош соврини – жаҳон кубогини оммага таништириш учун республика бўйлаб Trophy experience футзал тури маршрути ишлаб чиқилади ва амалга оширилади.
Жаҳон чемпионатида аккредитациядан ўтган шахсларни идентификацияловчи ва чипталарни замонавий технологиялар (QR-код) ёрдамида рўйхатга олувчи ва текширувчи махсус онлайн платформа ишлаб чиқилади.
2024 йил август – октябр ойларида жаҳон чемпионатида аккредитациядан ўтган шахслар, шунингдек, жаҳон чемпионати ўйинларига чипталари мавжуд бўлган хорижий ва маҳаллий мухлислар учун темирйўл чипталарига 50 фоиз миқдорида чегирмалар жорий қилинади.
Жаҳон чемпионатида аккредитациядан ўтган шахслар ҳамда ўйин кунлари чипталари мавжуд бўлган шахслар учун жамоат транспорт воситаларидан (автобус, метро) бепул фойдаланиш имконияти яратилади.
