FT: Эрон ҳукумати намойишларни қўллаган компаниялар ва тадбиркорларнинг мулкини мусодара қилмоқда

Эрон ҳукумати оммавий норозилик намойишларидан кейин қатағонни кучайтирди, мамлакат бўйлаб намойишларни қўллаб-қувватлаш айблари туфайли мулклар мусодара қилинмоқда ва бизнеслар ёпилмоқда, деб хабар берди Financial Times. 

Бош прокуратура 20 январ куни 20 дан ортиқ спортчилар, актёрлар ва киноижодкорларга нисбатан намойишларга ундаш бўйича иш қўзғатилганини маълум қилди. Уларнинг мол-мулки норозилик намойишларидан кўрилган зарарни қоплаш учун йўналтирилади, дея таъкидлаган идора.

Бундан ташқари, 60 га яқин кафе «террорчилик актлари»ни «бевосита ёки билвосита» қўллаб-қувватлагани аниқланган. Эрондаги Tasnim ахборот агентлиги ёзишича, мамлакатда машҳур бўлган қаҳвахоналар тармоғи ва савдо маркази эгаси Муҳаммад Сайдини ҳибсга олинган, унинг мулки эса мусодара қилинган. 

Расмийлар ислоҳотчиларнинг Ham-Mihan газетасини давлат шифохоналарининг намойишлар вақтидаги фаолиятини ёритгани туфайли ёпган. Яна бир ахборот агентлиги ва янгиликлар портали ёлғон ахборот тарқатишда айбланган (уларнинг номларига аниқлик киритилмаган). 

Эрон полицияси бошлиғи Аҳмад-Ризо Раданга кўра, намойишларга қўшилган ёшлар катта эҳтимол билан «алданган». У «тартибсизликларга етакчилик қилганлар ва иштирокчилар қаттиқ жазога тортилиши»ни таъкидлаган. Унинг қўшимча қилишича, [хориж] махсус хизматларига «алданган» шахслар жазоси юмшатилиши эвазига уч кун ичида таслим бўлиши керак.

2025 йил декабр ойи охирида Эронда ҳукуматга қарши кенг кўламли намойишлар бошланди. Хориждаги эронлик ҳуқуқ ҳимоячиларининг  HRANA ташкилоти маълумотига кўра, Эронда намойишлар шафқатсизлик билан бостирилиши оқибатида уч мингдан ортиқ киши ҳалок бўлган. Бошқа ҳуқуқ ташкилотлари эса қурбонлар сонини беш мингдан ортиққа баҳолаган. Интернет блоклангани туфайли Эрондан ишончли маълумот олишнинг имкони бўлмаяпти.

АҚШ президенти Доналд Трамп эронлик намойишчиларни ҳаракатни давом эттиришга чақириб, агар Эрон ҳукумати одамларни ўлдиришни бошлайдиган бўлса, ҳарбий аралашув билан таҳдид қилганди. 14 январ куни Трамп Эрон ҳукумати намойишчиларни қатл қилмоқчи эмаслигини айтиб чиқди.

Эрон олий раҳбари оятуллоҳ Али Хоминаий намойишлар вақтида «бир неча минг» киши ҳалок бўлганини тасдиқлаб, бунинг учун айбни намойишчиларга ва АҚШ ҳукумати зиммасига юклаган.