Қашқадарёдаги мактабларнинг 855 нафар ўқитувчисида коронавирус аниқлангани маълум бўлди

Манбада қайд этилишича, шу пайтгача қашқадарёлик 75 мингдан зиёд ўқитувчининг 32 261 нафарида COVID-19'га тест олинган холос. Шу сабабли анъанавий тарзда вилоятнинг фақат 10 фоиз мактабларида ўқиш бошланди. 

Таъкидланишича, вилоят ССБ ҳолат борасида сукут сақлашни маъқул кўриб, вақти-вақти билан кунлик статистикага 3-4 та янги ҳолат қайд этилгани ҳақида ахборот «ташлаб турибди».

«Ҳолбуки, биргина 14 сентябрнинг ўзида Қашқадарёда 41 ўқитувчида инфекция қайд этилган. Бу рақамни вилоят СЭОМ матбуот котиби Баҳриддин Эсонов тақдим этган бўлиб, у умумий манзарани тасаввур этиш қийинлиги, чунки ҳақиқий ҳолат ССВнинг расмий статистикасидан кескин фарқ қилишини айтди

Қизиқ, барча ўқитувчилардан тест олинганидан сўнг касалланганларнинг умумий сони қанча бўлар экан. Мактабларда аҳвол шундай экан, боғчаларда қанақа бўлиши мумкин?» – дейилади «Новости Кашкадарьи»нинг 15 сентябрдаги хабарида.

Соғлиқни сақлаш вазирлиги статистикасига кўра, шу пайтгача Қашқадарёда жами 1039 кишида коронавирус қайд этилган, шундан 958 нафари тузалиб, 13 нафари вафот этган. Даволанаётганлар – 68 нафар.

Маълумот учун, 14 сентябрдан Қашқадарё вилоятидаги 112та мактабда анъанавий дарс жараёнлари бошланган. Касби, Китоб ва Деҳқонобод туманларидаги барча мактабларда дарслар онлайн олиб бориляпти. Миришкор, Муборак ва Нишон туманларида эса иккитадан, Қамашида 3та мактаб очилган.