Пора талаб қилган профилактика инспекторлари қўлга олинди

Давлат хавфсизлик хизмати ҳамда ҳуқуқни муҳофаза қилувчи органлар томонидан ўтказилган тезкор тадбирларда Самарқанд ва Наманган вилоятларида фаолият юритган икки нафар профилактика инспекторининг коррупциявий ҳаракатларига чек қўйилди.

Фото: Видеодан кадрлар

Маълум қилинишича, Самарқанд шаҳар ИИО ФМБ профилактика инспектори собиқ ички ишлар ходимининг тизимга қайта ишга тикланишига мансабдор танишлари орқали ёрдам беришини айтиб, бунинг эвазига 7 минг АҚШ доллари талаб қилган. У мазкур пул маблағини олган вақтида ашёвий далиллар билан ушланган.

Шунингдек, Наманган вилояти Чуст тумани ИИБ профилактика инспектори фуқарога нисбатан келиб тушган мурожаатни кўрмасдан қолдирганлигини рўкач қилиб, ундан 2 минг АҚШ доллари талаб қилган. У аввал 700 доллар олган бўлиб, қолган 1300 долларни ҳамда келгусида давлат чегараси орқали чорва молларини ноқонуний олиб ўтишда кўмаклашиш эвазига яна 2 минг доллар сўраган.

ДХҲ, Бош прокуратура ҳузуридаги Департамент ҳамда ИИВ Шахсий хавфсизлик бош бошқармаси ходимлари ҳамкорлигида ўтказилган тезкор тадбирда инспектор навбатдаги пул маблағини олаётган вақтда қўлга олинган.

Ҳар икки ҳолат юзасидан тегишли моддалар билан жиноят ишлари қўзғатилиб, тергов ҳаракатлари олиб борилмоқда.

Фуқаролардан коррупция ва бошқа қонунбузилиш ҳолатларига дуч келганда бу ҳақда тегишли органларга хабар бериш сўралмоқда.