Ғазодаги эпидемия, Исроилнинг Синварга таҳдиди ва Россияда мигрантларни даромад солиғига тортиш таклифи — кун дайжести

Ўтган кун давомида жаҳонда рўй берган энг асосий воқеалар ва янгиликлар шарҳи билан кундалик хабарномамизда таништиришда давом этамиз.

Ғазодаги вазият

Ғазо бўлгасида болалар ўртасида тери касалликларига учраш ҳоллари кўпаймоқда.

Исроил томонидан қамал қилинган ва муттасил ҳужумларга дучор қилинаётган Ғазода тиббиёт муассасаларининг иши пароканда қилингани, сув таъминоти ва санитария тизими тўлиқ ишдан чиқарилгани касалликнинг янада авж олишига сабаб бўлмоқда.

Аҳоли мажбуран кўчирилган жойларда ўта зич яшаётгани, истеъмол учун тоза ичимлик сув, шунингдек, ювиниш учун сув етишмаслиги, шахсий гигиенага амал қилиш иложсиз экани ва кўчалар чиқиндилардан ўз вақтида тозаланмаётгани сабабли эпидемия тезда тарқалмоқда. Қичима, ич кетиши ва қизамиқ касалликлари ҳар куни юзлаб одамларда, айниқса ёш болаларда аниқланмоқда.

Фаластиндаги машъум урушнинг 306-кунига келиб, қурбон бўлганлар сони 39 минг 677 нафарга етди.

Ғазо соғлиқни сақлаш вазирлиги бўлинмасига кўра, сўнгги сутка ичида Исроил қўшинлари иккита оммавий қирғинни амалга оширган ва 24 кишининг ҳалок бўлиши ва 110 кишининг яраланишига сабабчи бўлган. Умуман, Ғазода шу пайтгача ярадор бўлганлар сони 91 минг 645 нафарга етган.

Ўлдирилган инсонларнинг 16 мингдан ортиғи ёш болалар. Ғазода яна қарийб 21 минг бола бедарак йўқолган ҳисобланади.

Исроилнинг Синварга таҳдиди

Исроил ҲАМАСнинг янги раҳбари Яҳё Синварга ўлдириш билан таҳдид қилди. Исроил Яҳё Синварни 2023 йилнинг 7 октябрида ҲАМАСнинг Исроилга уюштирилган кенг кўламли ҳужум ташкилотчиси деб ҳисоблайди.

Теҳронда ҲАМАСнинг аввалги сиёсий раҳбари Исмоил Ҳания ўлдирилганидан бир ҳафта ўтиб, ҲАМАС 61 ёшли Яҳё Синвар сиёсий бюронинг янги раҳбари этиб тайинланганини эълон қилган эди.

Исроил ташқи ишлар вазири Исроил Кац Х ижтимоий тармоғида Яҳё Синварнинг ҲАМАС сиёсий бюроси раҳбари этиб тайинланиши — уни тезроқ йўқотиш учун яхши сабаб бўла олишини ёзган.

Синвар тайинлангач, Исроил ташқи ишлар вазири Исроил Кац уни тезроқ йўқ қилиш зарурлигини таъкидлаган.

“Архитеррорчи Яҳё Синварнинг ҲАМАСнинг янги етакчиси этиб тайинланиши — уни тезроқ ўлдириш ва бу ташкилотни супуриб ташлаш учун яна бир асосли важ бўла олади”, — деб ёзган Кац ўзининг Х платформасидаги микроблогида.

Яҳё Синвар ҲАМАСнинг Исроил томонидан энг кўп қидирилаётган етакчилари рўйхатидан ўрин олган. ҲАМАС гуруҳининг Исроилга ҳужумидан сўнг у ортиқ одамлар орасида кўриниш бермаган ва тахминларга кўра Ғазо секторидаги ерости туннелларида жон сақламоқда.

Туркия Исроилга қарши даъвога қўшилди

Туркия Ғазо секторида Исроилнинг Фаластиннинг ҲАМАС ҳаракатига қарши уруши юзасидан Халқаро судда Исроилга қарши Жанубий Африка Республикаси даъвосига қўшилди. Унга етти давлат, шу жумладан Европа Иттифоқига аъзо Испания ҳам қўшилган.

Туркия парламенти делегацияси БМТнинг Ҳаагадаги Олий судига «Туркия Фаластин муаммосини ҳал қилишга катта аҳамият бераётганини» акс эттирувчи «аралашув баёноти»ни тақдим этди, деб ёзди Туркия ташқи ишлар вазири Хоқон Фидан.

ЖАР декабр ойида Халқаро судга Исроилга қарши даъво аризаси билан мурожаат қилган эди. У Исроилни Ғазо секторидаги геноцидда айблаган.

Январ ойи охирида суд Исроилга «геноцид»нинг олдини олишни буюрган дастлабки қарорни чиқарди. Май ойида Халқаро суд Исроилдан Ғазо сектори жанубидаги Рафаҳдаги ҳарбий амалиётини зудлик билан тўхтатишни, июн ойида эса Исроилга қарши геноцид содир этганликда айбловларни текшириш учун БМТ махсус вакилига операция ҳудудларига киришни таъминлашни талаб қилди.

ЖАРнинг Исроилга қарши даъвосига аввалроқ Никарагуа, Колумбия, Ливия, Мексика, Фаластин маъмурияти ва Европа Иттифоқига аъзо Испания қўшилган эди. Халқаро суд қарорлари қонуний кучга эга эмас, лекин жаҳон саҳнасида Исроилга босимни кучайтириши мумкин.

Украинанинг Курскка ҳужуми

Россиянинг Курск области Суджа ва Кореневский районларида сўнгги икки кундан бери жанглар давом этмоқда. Украина армиясининг бўлинмалари Россия Федерацияси ҳудудига кириб келган. Ўнлаб муддатли хизматни ўтаётган россиялик аскарлар асирга олинди. Россиянинг Ка-52 вертолёти FPV-дрон томонидан уриб туширилган.

Россия расмийлари душманнинг олдинга силжишини «тўхтатилган» ва «вазият назорат қилинмоқда» дея ишонтирмоқда, аммо чегарадан 10 километр узоқликдаги 5 минг аҳолиси бўлган Суджа шаҳрида жанглар ҳақида далиллар пайдо бўлмоқда. Украина томони чегарадаги ўзгаришлар ҳақидаги хабарга расман изоҳ бермади.

Россия президенти Путин хавфсизлик кучлари билан Курск вилоятидаги вазият юзасидан йиғилиш ўтказди. Қуролли кучлар Бош штаби бошлиғи Герасимовнинг сўзларига кўра, Украина Қуролли кучлари таркибида «мингтача одам» чегарани бузишда қатнашган.

Владимир Путин Украина Қуролли кучларининг Москвадан 500 км узоқликдаги Курск области билан чегарани кесиб ўтганини «кенг кўламли провокация» деб баҳолаган.

АҚШ Россиянинг Курск областидаги операция мақсадлари ҳақида кўпроқ билиш учун украиналик ҳарбийлар билан боғланмоқда, деган Оқ уй матбуот котиби Карин Жан-Пер. Унинг сўзларига кўра, АҚШ Украинанинг рус қўшинлари ҳужумларини тўхтатиш бўйича «оқилона» ҳаракатларини қўллаб-қувватлайди.

Ўз навбатида, Оқ уй Миллий хавфсизлик кенгашининг стратегик алоқалар бўйича координатори Жон Кирби АҚШнинг Украина Қуролли кучлари томонидан Америка қуролларидан фойдаланиш бўйича сиёсатида «ҳеч нарса ўзгармаганини» таъкидлади. Вашингтон Украинага Россиядаги нишонларга зарба беришга рухсат беради.

Россияда мигрантларга янги солиқ

Россияда мигрантлардан 30 фоизгача даромад солиғи ундириш таклиф этилди. Ғоя ташаббускори, депутат Леонид Слуцкийнинг фикрича, хорижлик ишчиларнинг даромади Россия бюджети учун ишлаши керак.

Қонун лойиҳасини Леонид Слуцкий бошчилигидаги ЛДПР фракцияси тайёрлаган.

Росстат маълумотларига кўра, 2022 йилда Россияда ишлаш учун рухсатнома олган хорижий фуқаролар сони 2,1 миллион кишини ташкил этган, улардан 2 миллиондан ортиғи меҳнат фаолиятини амалга ошириш учун патентга эга бўлган. 2023 йилда ҳам бу кўрсаткич шу рақамларга деярли яқин бўлган.

«Россия Солиқ кодексида солиқ резиденти бўлмаган жисмоний шахслар томонидан олинган барча даромадлар учун 30 фоиз солиқ ставкаси назарда тутилган. Шу билан бирга, патент асосида меҳнат фаолияти билан шуғулланадиган чет эл фуқароларининг даромадлари ушбу меъёрнинг талабларига боғлиқ эмас», дейилади қонун лойиҳасида. Муаллифлар бу қоидага тузатиш киритишни таклиф қилмоқда.

«Сўнгги йилларда кўпроқ хорижликлар Россияга ишлаш учун келишга ҳаракат қилмоқда. Бугунги кунда мигрантларнинг деярли учдан икки қисми патент бўйича ёлланма ишчи бўлиб ишлайди ва улар топган пулларини оиласига жўнатади. Аммо биз чет эллик ишчиларнинг даромади Россия бюджети учун ишлаши керак, деб ҳисоблаймиз», деган Леонид Слуцкий.

Унинг сўзларига кўра, бу бюджетни қўшимча даромадлар билан тўлдириш имконини беради, бу даромадлар шаҳар ва қишлоқларни ривожлантириш, жумладан, болали оилаларни қўллаб-қувватлаш ва бошқа ижтимоий аҳамиятга эга соҳаларни амалга оширишга йўналтирилади.

Эронга визасиз

Тожикистон ва Эрон визасиз режим жорий қилмоқда. Икки давлат ҳукуматлари ўртасидаги тегишли меморандум кучга киряпти.

2024 йил 10 августдан Тожикистон ва Эрон ҳукуматлари ўртасида умумий хорижий паспорт эгалари учун визани бекор қилиш бўйича ўзаро англашув меморандуми кучга киради. Бу ҳақда Тожикистон Республикаси Ташқи ишлар вазирлиги хабарида айтилади.

Икки давлатнинг умумий фуқаролик паспортлари эгалари бир-бирларининг ҳудудига биринчи кирган кундан бошлаб 90 кун ичида 30 кунлик муддатга визасиз ташриф буюришлари мумкин.

Биринчи босқичда визасиз тизимни жорий этиш фақат Душанбе-Теҳрон ва Теҳрон-Душанбе ҳаво йўналишларидан фойдаланадиганлар учун амалга оширилади.

Эслатиб ўтамиз, Эронда Ўзбекистондан самолётда борган ўзбекистонликлар учун ҳам 30 кунлик визасиз режим жорий этилган.