O‘zbekistonda noqonuniy janglarga qarshi choralar kuchaytiriladi

Taqdimotda so‘nggi vaqtlarda jangovar, ya’ni aralash sport turlari bo‘yicha noqonuniy janglar yashirin tarzda tashkil etilayotgani va ularda yoshlar ham ishtirok etayotgani qayd etildi. Shu bilan birga, bu kabi holatlar uchun amalda aniq javobgarlik choralari mavjud emasligi ko‘rsatib o‘tildi.

Shu bois, qonun hujjatlariga mazkur xavf-xatarlarning oldini olish, ularga qarshi keskin kurashish va bunday illatni tag-tomiri bilan bartaraf etishga qaratilgan yangi normalarni kiritish zarurligi ta’kidlandi.

Xususan, og‘ir va o‘ta og‘ir turdagi jinoyatlarni sodir etish maqsadida jinoiy uyushma tashkil etganlik, uni moliyalashtirganlik, shuningdek, bunday tuzilmalar tomonidan sodir etilgan jinoyatlarni yashirishga homiylik qilganlik uchun jinoiy javobgarlik belgilash taklif etildi.

Shuningdek, jangovar sport turlari bo‘yicha musobaqalarni noqonuniy tashkil etganlik va o‘tkazganlik uchun jinoiy javobgarlik, qonunga zid ravishda tashkil etilgan musobaqalarda ishtirok etganlik uchun esa ma’muriy javobgarlik joriy etish taklif qilindi. Bundan tashqari, bezorilik jinoyati uchun jazo choralarini kuchaytirish ham nazarda tutilmoqda.