Vodiy viloyatlaridagi gaz zapravkalar ikki kunga gazdan uziladi

Iste’molchilarning tabiiy gaz ta’minoti ishonchliligini oshirish maqsadida davlat dasturlari doirasida magistral gaz tarmoqlarini kuz-qish mavsumiga tayyorlash ishlari izchil davom ettirilmoqda.

Farg‘ona vodiysi iste’molchilarini tabiiy gaz bilan ta’minlovchi “Ohangaron–Pungon” magistral gaz quvurining tog‘li hududdan o‘tuvchi qismida qariyb 22 km qo‘shimcha quvur qurilishi yakuniga yetkazildi.

Mazkur quvurning ishga tushirilishi vodiy viloyatlari iste’molchilarining tabiiy gaz ta’minoti ishonchliligini oshirishga xizmat qiladi.

Ushbu yangi quvurni tarmoqqa ulash bo‘yicha montaj ishlari olib borilishi munosabati bilan 2025 yil 5 sentabr kuni soat 12:00 dan boshlab 36 soat davomida “Ohangaron–Pungon” magistral gaz quvuri orqali tabiiy gaz uzatish vaqtincha to‘xtatiladi.

Mahalliy hokimliklar bilan kelishilgan holda ta’mirlash ishlari vaqtida (5-6 sentabr kunlari) Farg‘ona vodiysi viloyatlaridagi avtomobillarga gaz to‘ldirish kompressor shoxobchalari (AGTKSh) hamda yirik iste’molchilarning gaz ta’minotiga vaqtincha cheklov kiritiladi.

Shuni hisobga olgan holda vodiy viloyatlari iste’molchilari uchun avtobenzin yonilg‘isining sotuvga chiqarish hajmi oshiriladi.

Ma’lumot uchun: ushbu qurilish-montaj ishlari davomida aholi iste’molchilarini tabiiy gaz bilan barqaror ta’minlash bo‘yicha barcha zaruriy choralar ko‘riladi.