Migratsiya agentligi xorijda vafot etganlarning jasadlarini qaytarish uchun pul yig‘ayotgan firibgarlardan ogohlantirdi

Ijtimoiy tarmoqlarda xorijda bo‘lib turgan vaqtida vafot etgan O‘zbekiston fuqarolarining jasadlarini yurtga olib kelish uchun turli plastik kartalarga pul yig‘ish aksiyalari o‘tkazilmoqda. Migratsiya agentligi ushbu holat yuzasidan ehtiyotkorlikka chaqirdi.

Ta’kidlanishicha, ayrim holatlarda firibgarlar eski yoki noto‘g‘ri ma’lumotlar asosida odamlarning his-tuyg‘ularidan foydalanib, pul ishlab olishga urinmoqda.

«Bu kabi xabarlarni ko‘rsangiz, hech qanday pul o‘tkazmang. Qonuniy va ishonchli yo‘l — Migratsiya agentligiga murojaat qilish», – deyiladi xabarda.

Agentlik agar O‘zbekiston fuqarosi xorijda vafot etgan bo‘lsa, Migratsiya jamg‘armasi mablag‘lari hisobiga yurtga olib kelinishini eslatib o‘tdi.

Shu kabi vaziyatlarda agentlikning quyidagi raqamlariga murojaat qilish so‘raladi:

• (71) 202−33−55;
• 1282;
• Telegram bot: @huquqiy_yordam_uzbot.