O‘zbekiston va Saudiya Arabistoni o‘rta tibbiyot xodimlarini ishga joylashtirish bo‘yicha kelishuv imzoladi

Migratsiya agentligi ma’lumotiga ko‘ra, O‘zbekiston va Saudiya Arabistoni o‘rtasida mehnat migratsiyasi yo‘nalishida muhim yangi kelishuv imzolandi. Hujjat Migratsiya agentligi hamda Saudiyaning Health Resources Company (HRCO) kompaniyasi o‘rtasida tuzilgan.

Ikki tomonlama manfaatli ushbu kelishuvning asosiy maqsadi — Saudiya Arabistonida o‘rta tibbiyot xodimi sifatida ishlash istagida bo‘lgan yurtdoshlarni ushbu mamlakatga qonuniy, xavfsiz va shaffof tartibda ishga joylashtirishdan iborat.

Ma’lumot o‘rnida, HRCO (Health Resources Company) Saudiya Arabistoni sog‘liqni saqlash tizimini markazlashgan tarzda boshqarish bo‘yicha amalga oshirilayotgan keng qamrovli islohotlar doirasida tashkil etilgan muhim tuzilma hisoblanadi. Kompaniya inson resurslari (HR) operatory sifatida mamlakatdagi barcha davlat tibbiyot muassasalari uchun yagona kadrlar siyosatini ishlab chiqish va boshqarish bilan shug‘ullanadi.

Migratsiya agentligi e’lonlariga ko‘ra, Saudiyada ishlash istagini bildirib ariza qoldirgan 887 nafar nomzod o‘rta tibbiyot xodimlari orasida saralash ishlari olib borilgan va suhbatga tayyor deb baholanganlar uchun ish beruvchi tomon vakillari ishtirokidagi tanlovlar boshlangan.

Yurtdoshlarga qulaylik yaratish maqsadida bunday suhbatlar joriy yil 3–4 dekabr kunlari Andijon shahrida ham o‘tkazilishi belgilangan.