Naqd shaklda pensiya tarqatishda Face-ID qo‘llana boshlandi

Pensiyani naqd shaklda oluvchilar endilikda biometrik identifikatsiya (Face-ID)dan o‘tib, pulni olganini elektron imzosi orqali tasdiqlaydi. Pensiya jamg‘armasi xabariga ko‘ra, shu orqali hisobotlarda pensiya “to‘landi” deb yozilib, aslida to‘lanmay qolgan yoki pul boshqa shaxsga berib yuborilgan holatlarning oldi olinadi.

Foto: Pensiya jamg‘armasi matbuot xizmati

Fuqarolarni biometrik identifikatsiya qilish (Face-ID) orqali naqd shaklda pensiya to‘lash boshlandi.

Pensiya jamg‘armasi xabariga ko‘ra, oktyabr oyidan boshlab hududlarda pensiyalarni naqd shaklda to‘lashda fuqarolar biometrik identifikatsiya (Face-ID) qilinyapti va ularning imzosi elektron shaklda olinyapti.

“Endilikda to‘lov jarayonida bo‘lishi mumkin bo‘lgan Xalq banki tomonidan hisobotlarda "to‘landi" deb hisobot berilib, amalda fuqaroga to‘lanmaslik yoki boshqa shaxslarga to‘lab yuborish holatlari oldi olinadi”, – deyiladi rasmiy xabarda.

Avvalroq Pensiya jamg‘armasi ijrochi direktori Murodbek Otajonov hukumatda pensiya yoshini oshirish rejasi borligini tasdiqlagandi.

Tayyorlagan: Комрон Чегабоев

#pensiya