Boks. Otabek Xolmatov WBA chempionlik kamari uchun Raymond Fordga texnik nokaut bilan yutqazdi

Bugun, 3 mart tongida AQShning Nyu-York shtati, Verona shahrida katta prof boks turniri o‘tkazilmoqda.

Foto: Getty Images

Boks kechasi doirasida yarim yengil vazn toifasida o‘zbekistonlik charm qo‘lqop ustasi Otabek Xolmatov (11-0, 10 KO) WBA chempionlik kamari uchun Raymond Fordga (14-0-1, 7 KO) qarshi ringga chiqdi. 12 raundga mo‘ljallangan jang 12-raund tugashiga 7 soniya qolganida yakuniga yetdi.

Dastlabki raundlarda Xolmatov ustunlikni qo‘liga olib, yaxshi harakat qilgan bo‘lsa-da, jangning ikkinchi qismida amerikalik bokschi ochiq jangni taklif qilgach, hamyurtimiz himoyalanishga qiynalib, zarbalarni o‘tkazib yubordi. 12-raundda muvozanatni yo‘qotgach, hakam texnik nokautni qayd etdi.

Shu tariqa, Otabek faoliyatidagi birinchi mag‘lubiyatni tan oldi. Raymond Ford esa yarim yengil vazn toifasining WBA kamarini qo‘lga kiritdi.