Rossiya migratsiya qonunchiligini kuchaytirmoqchi. Bu jinoyatlar soni ko‘payishi bilan izohlanmoqda

Aleksandr Bastrikinning fikricha, rossiyaliklar muhojirlardan jiddiy xavotirda. Bu haqda Baza telegram kanali xabar bermoqda.
 
Ma’lum bo‘lishicha, dekabr oyi oxirida Tergov qo‘mitasi raisi prezidentga muhojirlar jinoyati haqida ma’lumot beruvchi maktub yo‘llagan. Aleksandr Bastrikin «vaziyatni keskinlashtirgan» agressiv mehnat muhojirlari haqida gapirgan.

Bastrikinning hisob-kitoblariga ko‘ra, 2021 yilning 11 oyi davomida migrantlar tomonidan 33,5 mingta jinoyat sodir etilgan. Ular orasida rossiyalik bosh tergovchi Viborgdagi voqeani alohida ta’kidladi - bunda olti nafar o‘zbekistonlik ikki politsiyachini qattiq kaltaklagan.

Bundan tashqari, Tergov qo‘mitasi rahbari Putinga jamiyatdagi kayfiyat haqida yozgan – fuqarolar, uning so‘zlariga ko‘ra, maishiy xizmat ko‘rsatish sohasini «monopoliyaga olgan» muhojirlardan «jiddiy xavotirda». Biznes vakillari ham quruq qolmadi: Bastrikin prezidentga ular muhojirlarning hozirgi «deyarli qullik» holatidan manfaatdor ekanini aytgan. 

Tergov qo‘mitasi rahbari migratsiya qonunchiligini kuchaytirishni taklif qildi: masalan, ish beruvchilarga migrantlarni uy-joy bilan ta’minlash va transport xarajatlarini to‘lash majburiyatini yuklash, kelgan xorijliklarni genom bo‘yicha ro‘yxatga olishni joriy etish va yirik shaharlarda «aholi etnik-madaniy muvozanatini saqlash» choralarini ko‘rish, shuningdek, ijtimoiy keskinlikni kamaytirish maqsadida mehnat muhojirlarini Rossiya fuqarolari bilan almashtirish.