Samarada o‘zbekistonliklar yashagan uy yonib ketdi, halok bo‘lganlar bor

Yong‘in natijasida 5 kishi jarohat olgan, 4 kishi vafot etgan. Jarohatlanganlardan biri O‘zbekiston fuqarosi A.X. N.I.Pirogov nomli 1-son shahar klinik shifoxonasiga yotqizilgan. Tashxis – is gazidan zaharlanish, boshning yumshoq to‘qimalari lat yeyishi.

Vafot etganlarning shaxsi aniqlanmoqda, deyiladi Tashqi ishlar vazirligi xabarida.

Rossiya huquqni muhofaza qilish idoralari tergov harakatlarini olib bormoqda. Bosh konsulxona vaziyatni nazoratga olgani hamda vakolatli organlar va tibbiyot muassasasi bilan doimiy aloqada bo‘lib turgani aytiladi.

Konsullik-huquqiy departamenti marhumlarning oila a'zolari va yaqinlariga ta'ziya bildirgan va Rossiyaning Volgabo‘yi federal okrugi (Boshqirdiston Respublikasi, Kirov viloyati, Mariy El Respublikasi, Mordoviya Respublikasi, Nijyegorod viloyati, Orenburg viloyati, Penza viloyati, Perm o‘lkasi, Samara viloyati, Saratov viloyati, Tatariston Respublikasi, Udmurtiya Respublikasi, Ulyanov viloyati, Chuvashiya Respublikasi) hududida bo‘lib turgan O‘zbekiston fuqarolariga zarurat tug‘ilgan holatlarda Qozon shahridagi mamlakat bosh konsulxonasiga quyidagi telefon raqamlari orqali murojaat qilishlari mumkinligini ma'lum qilgan: +7-843-526-55-64, +7-843-526-55-65.