Fuqarolarga o‘z maoshini oladigan bankni tanlash huquqi beriladi

Markaziy bankning to‘lov tizimida jismoniy shaxslar uchun mobil raqamdan foydalangan holda ularning bank hisobvaraqlaridan to‘g‘ridan to‘g‘ri o‘tkazmalar xizmati joriy qilinadi. Regulyatorning tezkor to‘lovlar tizimida jismoniy shaxslar o‘rtasida “P2P” o‘tkazmalarini amalga oshirish imkoniyati ishlab chiqiladi va to‘lov xizmatlari ko‘rsatuvchilarga Open API ko‘rinishida taqdim etiladi.

Bu – 27 noyabr kuni imzolangan “O‘zbekistonda moliyaviy texnologiyalar sohasini yanada rivojlantirish chora-tadbirlari to‘g‘risida”gi prezident qarorida belgilandi.

Unga ko‘ra, shuningdek, chakana bank xizmatlari va to‘lov xizmatlari bozorida raqobatni rag‘batlantirish maqsadida majburiy mijozlar auditoriyasidan voz kechgan holda foydalanuvchilarga bank kartasini ochishda imkoniyatlar yaratiladi. Bunda fuqarolarga o‘z maoshini oladigan bankini yoki elektron hamyon provayderini tanlash huquqi beriladi.

Savdo va xizmat ko‘rsatish nuqtalari uchun universal QR-kod ham joriy etiladi. QR-kodlar orqali to‘lovlarni amalga oshirishning yagona standartlari tatbiq qilinadi.