«Yuzlab maktab o‘quvchilarini zaharlab qo‘ygan tadbirkor ozgina jarima bilan qutulib ketyapti» – Sog‘liqni saqlash vaziri

Ovqatdan ommaviy zaharlanish holatlari kamayishi uchun bunga yo‘l qo‘ygan shaxslarning javobgarligi kuchaytirilishi lozim, deb hisoblaydi Sog‘liqni saqlash vaziri Alisher Shodmonov.

Kun.uz muxbirining xabar berishicha, vazir Senatning 23-yalpi majlisida shu haqda fikr bildirgan.

«Yana bir muhim masala – tadbirkorning mas'uliyati va javobgarligini oshirish. Biz ikki yil davomida tadbirkorlar ustidan tekshiruvni chekladik. Va buning natijasidagi raqamlar:

2017 yilda 607 kishi jabrlangan, 6 kishi o‘lgan;
2018 yilda 583 kishi jabrlangan, 3 kishi o‘lgan,
2019 yilning 9 oyida 358 kishi jabrlanib, 2 kishi vafot etgan.

Endi savol tug‘iladi: biz tadbirkorlarni qo‘llab-quvvatlab, ularning huquqini birinchi o‘ringa qo‘yishimiz kerakmi yoki iste'molchining huquqini, xalqning salomatliginimi?

Tadbirkor qonundan ham, xudodan ham qo‘rqsin. Hozir ikkalasidan ham qo‘rqmayapti. Chunki yuzlab maktab o‘quvchilarini zaharlab qo‘yib, ozgina ma'muriy jarima bilan qutulib ketyapti. Albatta, bundan keyin yana bemalol ishini davom ettiryapti», – deydi Alisher Shodmonov.

Uning qayd etishicha, sanitar-epidemiologik nazoratni kuchaytirish bo‘yicha tuzilgan maxsus ishchi guruh qonunchilikka kiritiladigan tegishli o‘zgarishlar bo‘yicha takliflarni kelayotgan haftaning boshida bosh vazirga kiritadi.

«Biz shunday maqsadga erishamizki, har bir fuqaromiz umumiy ovqatlanish joyida ham, maktab-bog‘chada ham qo‘rqmasdan ovqatlana oladigan bo‘ladi», deb qo‘shimcha qildi Sog‘liqni saqlash vaziri.

Alisher Shodmonov ovqatdan ommaviy zaharlanish holatlari tez-tez kuzatilayotganiga sabablar sifatida – tegishli bino va ovqat tayyorlash jihozlarining talabga javob bermasligi, ovqatni tayyorlashda ishlatiladigan mahsulotlarning sifatsizligi, oshxonada ishlovchi kadrlarning salohiyati yo‘qligi kabi omillarni sanab o‘tdi.