Qurilish vazirligi Toshkentda 110 mingta uy buzilishi boshlangani haqida tarqalgan xabarlarni rad etdi 

Qurilish va uy-joy kommunal xo‘jaligi vazirligi ma’lum qilishicha, bu xabarlar haqiqatga to‘g‘ri kelmaydi. Ayni kunlarda mamlakatda ko‘p qavatli uy-joy fondining seysmik holatini o‘rganish va baholash ishlari olib borilmoqda. Bu tadbirlar aholi xavfsizligini ta’minlash maqsadida profilaktik tarzda amalga oshirilmoqda.

Qayd etilishicha, hozirda hech qanday rasmiy hujjatlarga ega bo‘lmagan bitta obektda seysmik talablarga mos kelmaslik holati aniqlangan. Fuqarolar xavfsizligini ta’minlash maqsadida ushbu obekt bo‘yicha belgilangan tartibda tegishli chora-tadbirlar ko‘rilgan.

Ayni vaqtda, ommaviy ravishda uy-joylarni buzishga oid hech qanday qaror yoki reja mavjud emas.

"Fuqarolardan ishonchsiz manbalar orqali tarqalayotgan asossiz xabarlarga ishonmaslik va rasmiy ma’lumotlarga tayanish so‘raladi. Yolg‘on axborot tarqatganlik uchun esa qonunchilikda javobgarlik belgilanganini eslatib o‘tamiz", deyiladi vazirlik xabarida.