Toshkentdagi barcha avtomobillarga yil oxirigacha eko-stiker beriladi

2026 yil yakuniga qadar Toshkent shahridagi barcha avtotransport vositalariga ekologik toifasini tasdiqlovchi ekologik stikerlar berilishi kerak. “Toza havo” umummilliy loyihasi to‘g‘risidagi prezident farmoni bilan, Ichki ishlar vazirligiga shunday vazifa yuklatildi.

Ekologiya qo‘mitasi esa 2026 yil yakuniga qadar Toshkent shahri hududi “qizil”, “sariq” va “yashil” zonalariga ajratib chiqilishini ta’minlashi lozim.

Farmonga binoan, respublikadagi barcha neftni qayta ishlash zavodlari 2028 yil 1 noyabrga qadar “Yevro-4”, 2030 yil 1 martdan boshlab “Yevro-5” ekologik toifa talablariga muvofiq bo‘lgan motor yoqilg‘ilarini ishlab chiqarishi kerak. Energetika vazirligi buning uchun zavodlarni modernizatsiya qilish dasturini 2026 yil 1 noyabrgacha ishlab chiqib, Vazirlar Mahkamasiga tasdiqlash uchun kiritishi zarur.

Eslatib o‘tamiz, O‘zbekistonda “Ekologik transport” tizimi 2026 yil 1 yanvardan boshlab rasman kuchga kirgan. Unga asosan, shaharlar hududi va transport vositalari “yashil”, “sariq” va “qizil” zonalarga ajratib chiqiladi hamda shaharning tegishli zonasiga tegishli rangdagi ekostikerga ega bo‘lmagan avtomobillarning kirishi cheklanadi.

Bu tartibni buzganlik uchun jarima qo‘llash – 2027 yildan boshlanishi ko‘zda tutilgan.