Alisher Qodirov o‘zbekistonliklarni Rossiyadan ketishga chaqirdi

Deputat Xabarovskdagi voqeaga munosabat bildirib, “vaziyat faqat yomonlashishi”ni aytdi. “Aqlingizni ishlating, Rossiyadan tezroq keting! Hech qanday daromad ota-onalar va farzandlaringizning ko‘z yoshiga arzimaydi!” – deya migrantlarga murojaat qildi Alisher Qodirov.

Foto: "Milliy tiklanish" partiyasi axborot xizmati

Oliy Majlis Qonunchilik palatasi deputati, “Milliy tiklanish” partiyasi raisi Alisher Qodirov Rossiyaning Xabarovsk shahrida OMON xodimlari O‘zbekiston fuqarosini kaltaklab o‘ldirgani haqidagi xabarga munosabat bildirib, RFdagi vatandoshlarga murojaat bilan chiqdi.

“Ishoning, vaziyat oy sayin faqat yomonlashadi.

Rus maxsus xizmatlari markaziy osiyoliklarni Rossiyada kutilayotgan notinchliklarning faol ishtirokchisi sifatida taxmin qilmoqda, shu sababli ulardan keladigan foydadan allaqachon kechib bo‘lingan.

Aqlingizni ishlating, Rossiyadan tezroq keting! Hech qanday daromad ota-onalar va farzandlaringizning ko‘z yoshiga arzimaydi!” – deb yozdi Qodirov o‘z Telegram-kanalida.

Avvalroq Xabarovskdagi holat yuzasidan O‘zbekiston TIV Rossiya tomoniga nota yo‘llagan edi.