Vodiyda dasturchilar xakatoni boshlandi. Farg‘onada g‘oliblar aniqlandi

Xakatonni BMT Giyohvand moddalar va jinoyatchilik bo‘yicha boshqarmasining Markaziy Osiyodagi vakolatxonasi, Yosh tadbirkor, Yoshlar ishlari agentligi hamda IT park hamkorligida tashkil etildi.

Tadbirda farg‘onalik dasturchilar 24 soat ichida beto‘xtov ish olib borib, tundan tonggacha uchta asosiy yo‘nalish: zo‘ravonlik bilan kurash, ishsizlikni bartaraf etish va korrupsiyaga qarshi kurash bo‘yicha IT-yechimlarni hay'at a'zolariga taqdim etdi.

Musobaqa natijasida IlmSoft jamoasi o‘zining bolalar zo‘ravonligiga qarshi dasturi bilan g‘olib deb topildi va HP Omen noutbuklari bilan taqdirlandi.

2-o‘rinni yoshlar uchun stajirovka va tajriba talab etilmaydigan ishlarni topish platformasi loyihasini ishlab chiqqan Cactus Corp jamoasi qo‘lga kiritdi.

Yoshlarni ish bilan ta'minlash platformasini taklif etgan MK Group jamoasi sovrindor uchlikni yakunlab berdi. Ularga tashkilotchilar tomonidan bepul biznes konsultantlar, akseleratsiya dasturlari va yillik ofis taqdim etildi.

Endilikda ushbu xakaton Andijon va Namangan shaharlarida ham bo‘lib o‘tadi.

Eslatib o‘tamiz, 16 noyabrda start olgan xakaton 21 noyabrga qadar davom etadi. Unda vodiyning uchta viloyatidan 20 nafardan (4 kishidan iborat 5tadan jamoa) – jami 60 nafar ishtirokchi qatnashmoqda.