Josuslikda gumon qilingan amerikalik Pokistondan qayta surgun qilindi

Pokiston hukumati 7 avgust kuni 2011 yilda josuslik uchun deportatsiya qilingan AQSh fuqarosi Metyu Kreyg Barretni mamlakatdan surgun qilishdi. Bu haqida Dawn nashri ma'lum qildi. 

2011 yilda huquq-tartibot organlari Barretning yopiq obektga kirganligi to‘g‘risida ma'lumot olishdi. Amerika fuqarosi o‘zining Islomoboddagi uyida qo‘lga olingan. Hukumat ma'lumotiga ko‘ra, uning yonidan obektning suratlari va xaritasi topilgan. 

Tergov ishlari bo‘yicha federal agentlik Barretning mamlakatga kirishi taqiqlanganligiga qaramay, qanday qilib Pokiston vizasini olgani va to‘siqlarsiz chegara nazoratidan o‘tganligiga doir tekshiruv o‘tkazmoqda.   

AQShning Pokistondagi elchixonasi shaxsiy ma'lumot daxlsizligini bahona qilib, mazkur hodisani izohlashdan bosh tortdi.