Rossiya KXDRga qat'iy talabini ilgari surdi

Rasmiy Moskva KXDRning navbatdagi yadro sinovini qoralaydi hamda mamlakat hukumatidan «xavfli g‘alamislik»larga barham berish, raketa-yadro dasturidan voz kechishni talab qiladi. Rossiya TIV 9 sentabr kuni e'lon qilgan bayonotida shu haqda so‘z yuritilgan. 

Vazirlikda qayd etishlaricha, «KXDRning yadro qurolini tarqatmaslik bo‘yicha global tartibni buzishga qaratilgan harakatlari Koreya yarimoroli va Osiyo Tinch okeani mintaqasidagi tinchlik va xavfsizlikka jiddiy tahdid soladi». Rossiya tashqi siyosat mahkamasining ta'kidlashicha, yangi yadro sinovlari Pxenyan uchun jiddiy salbiy oqibatlarga olib keladi. 

Rossiya, shuningdek, Shimoliy Koreyaning BMT XK talablarini so‘zsiz bajarishga hamda Yadro qurolini tarqatmaslik shartnomasida ishtirokini qayta tiklashga chaqiradi, deyiladi hujjatda. 

Shu bilan birga, Rossiya TIV mintaqa davlatlarini Koreya yarimorolida keskinlikni yanada kuchaytiruvchi hatti-harakatlardan o‘zlarini tiyib turishga undagan. 

Pxenyan ma'muriyati 9 sentabr kuni KXDR tashkil topganining 68 yilligi munosabati bilan navbatdagi yadro sinovini o‘tkazdi. Shu munosabat bilan, BMT XK o‘zining favqulodda yig‘ilishini o‘tkazadi.