Xitoy kashandalikka qarshi kurashni kuchaytirmoqda

Xitoy poytaxti va yana 19ta yirik shaharning jamoat joylarida sigareta chekishga o‘rnatilgan taqiqlarni mamlakatning barcha yirik aholi punktlariga joriy qilish rejalashtirilmoqda. Bu haqda XXR sog‘liqni saqlash va rejali tug‘ilish ishlari bo‘yicha davlat qo‘mitasi matbuot kotibi Mao Tsyunan ma'lum qildi.

"Bu muammoni hal etish uchun chekish zararidan keng jamoatchilikni ogohlantirish lozim, - deya matbuot kotibi so‘zlarini keltiradi Sinxua agentligi. – Chekuvchilar ongli bo‘lishi, chekmaydiganlar esa, o‘z huquqlari ta'minlanishi uchun yetarli darajada huquqiy bilimga ega bo‘lishlari talab etiladi".

Mao Tsyunan joriy qilinishi rejalashtirilayotgan yangilik muddatini ma'lum qilmagan. Uning yodga olishicha, Pekinda ruxsat berilmagan joyda chekkan qoidabuzarga 200 yuan (29 dollar) miqdorida jarima solinadi.