Fakt: Time Trampni «Amerika Tarqoq Shtatlari prezidenti» deb tanishtirdi

Amerikaning Time jurnali «2016 yil odami» deb e'lon qilingan Donald Trampni «Amerika Tarqoq Shtatlari prezidenti» (President of the Divided States of Amerika) sifatida tanishtirdi.

«Mamlakat saylovlar mavsumini har doimgidan ham bo‘lingan holda o‘tkazdi», — degan jurnal bosh muharriri Nensi Gibs.

Kecha Donald Tramp o‘z tvitterida «soat 7.30da Today Show undan intervyu olishini» yozib, o‘zining «yil odami» deb e'lon qilinishiga sha'ma qilgandi. Keyinroq Today Show chorshanba kuni «yil odami»dan intervyu olishi ma'lum bo‘ldi. Ko‘p o‘tmasdan Time AQShning yangi saylangan prezidentini «Yil odami» deb topdi.

Bu yil Trampga 11 nomzod raqiblik qildi, ular orasida Rossiya prezidenti Vladimir Putin, Turkiya prezidenti Rajab Toyyib Erdo‘g‘an, Britaniya mustaqillik partiyasi asoschisi Nayjyel Faroj, AQSh prezidentligiga sobiq nomzod Hillari Klinton, Facebook asoschilaridan biri Mark Tsukerberg bor edi.

Time jurnali 1927 yildan buyon «yil odami»ni aniqlab keladi. 1950 yilga qadar bu nomga aniq shaxslar sazovor bo‘lgan bo‘lsa, keyinchalik mavhum qahramonlar ham mazkur nomni olgan.